11/02/2014 14:28:10

Sinjalistikë; mirëmbajtje; penalizime; patenta dhe... burg

Paketa e re për sigurinë rrugore. Për herë të parë drejtimi i makinës pa patente konsiderohet vepër penale dhe mund të ndëshkohet me dhjetë ditë burg; propozimi i Ministrisë së Brendshme. Do të vendoset një distancë mes karburanteve që parashikohet rreth 20 km

TIRANE - Qeveria do të merret tani me çështjen më të përfolur të ditëve të fundit. Gati paketa e masave për rritjen e sigurisë për drejtuesin dhe kalimtarin.

Për këtë do të ketë dy ndërhyrje në Kodin rrugor dhe penal. "Do të merremi me vetë rrugën, automjetin, drejtuesin e automjeteve, zbatimin e ligjshmërisë. Do vendosim një sistem të tillë cilësie që të mos korruptohet më", tha Ministri i Transporteve Haxhinasto në një konferencë për shtyp me Ministrin e Brendshëm Saimir Tahiri.

Qeveria do të forcojë proçedurën e kontrollit të mjeteve, do të liberalizojë tregun për përmirësimin e shërbimit. "Do të vendosim elementë të sigurisë në kontrollin e makinave, do të vendosim kontroll të detyrueshëm dhe për cilësinë e mjeteve, motorëve dhe për nivelin e ndotjes së gazërave", tha ai.

Do të ketë ndërhyrje dhe në sinjalistikë dhe "do t'a ruajmë rrugën nga dëmtimet duke forcuar masat, ndëshkimet dhe për kompanitë që shpesh blejnë elementë të sinjalistës për përfitime të tyre", vijon Haxhinasto.

"Shumë rigoroz do të tregohemi në ndërhyrjet në rrugë, për ndërtimet të paligjshme dhe për hyrje-daljet të paautorizuara dhe do të vendosim një standart për hyrje daljet në rrugë në mënyrë që ato mos të jenë në pikat e zeza që shkaktojnë aksidentet", shtoi Haxhinasto.

"Do të ketë rikonceptim të elementëve të testimit, prezantim të teknologjisë së informacionit, do të kemi një teknologji shumë konkrete që askush të mos abuzojë me ata që janë persona të aftë e që mund të marrin provimet, praktikë e teori, t’ i japim fund njëherë e përgjithmonë pagesave nën dorë", tha ministri.

“Ne do të shkojmë në standardin europian të transportit”, deklaroi Haxhinasto.

Kreu i MTI-së, tha se do të vendoset një distancë mes karburanteve që parashikohet rreth 20 km. Ministri Haxhinasto foli edhe për mirëmbajtjen e akseve rrugore të ndërtuara tashmë. Konkretisht për rrugën e Kombit, Haxhiansto tha se jemi në procesin e përgatitjes së tenderimit të mirëmbajtjes së rrugës, dhe në fund të pranverës zhvillohet tenderi.

Ministri i Brendshëm, Saimir Tahiri, tha se ka dorëzuar në Ministrinë e Drejtësisë propozimin për të dënuar me 10 ditë burg të shoferëve pa patentë dhe që drejtojnë automjetin në gjendje të duhur.

"Të drejtosh mjetin pa leje drejtimi dhe në gjendje të dehur nuk është shkelje e kodit rrugor por përbën vepër penale. Ndaj si e tillë Ministria e Brendshme ka prezantuar që dënimi minimal i mundshëm të jetë 10 ditë heqje lirie. Për statistikë, në 4 muaj që nga dita e parë të ushtrimit të detyrës policia filloi praktikën e arrestimit të personave, të cilët drejtojnë automjetin në gjendje të dehur dhe ky numër është 660 shtetas të ndalur, por që 83 persona janë dhënë vendimet nga gjykatat", tha Tahiri. //HermesNews ©2014// Na ndiqni dhe në Facebook dhe Twitter

Doriana Metollari

Dërgo me email | Stampo artikullin