31/01/2014 16:04:16

Protesta e të pastrehëve në Bashki

Me ndryshimet ligjore në vitin 2007, banorëve u është kërkuar nënshkrimi i një kontrate të re, që i detyron ata të paguajnë shtëpitë me çmimin aktual të tregut

KORCË - Rreth 40 familje në Korçë, të cilat kanë përfituar banesa sociale më qera nën statusin e të pastrehëve, kanë protestuar sot para Bashkisë së qytetit, pasi rrezikojnë të dalin në rrugë, për shkak të mosbërjes së kontratës së shtëpisë. Ata thonë se apartamentet e banimit i kanë përfituar në vitin 2006 dhe sipas ligjit të atëhershëm, ata duhet të paguanin si qera mujore një shumë të vogël parash, që shkonte deri tek 8 mijë lekë të vjetra. Ata shprehen se në atë kohë nuk kanë nënshkruar një kontratë me Entin e Banesave. Ndërkohë me ndryshimet ligjore në vitin 2007, banorëve u është kërkuar nënshkrimi i një kontrate të re, që i detyron ata të paguajnë shtëpitë me çmimin aktual të tregut. Kjo për ta është e tepërt pasi nuk mund ta përballojnë për shkak të gjendjes së tyre ekonomike.

Banorët e këtyre apartamenteve, të cilat ndodhen në lagjen 15 të qytetit, i janë drejtuar sot Bashkisë për t’i bërë apel për zgjidhjen e këtij problemi. Ndërkohë, Bashkia e Korçës, në cilësinë e pronarit të këtyre apartamenteve prej vitit 2012, u ka kërkuar banorëve nënshkrimin e kontratës në fjalë, duke u lënë një afat përfundimtar deri në muajin mars, në të kundërt banorët duhet të lirojnë këto banesa. Na ndiqni dhe në Facebook dhe Twitter

HermesNews - ©2014

Dërgo me email | Stampo artikullin