31/01/2014 15:13:26

Lidhje pragmatike me Moskën

Orban është kritikuar mjaft në Hungari për nënshkrimin së fundi të një kontrate me Rusinë rreth zgjerimit të centralit bërthamor hungarez në Paks

BUDAPEST - Kryeministri konservator hungarez, Viktor Orban, i cili sapo ka nënshkruar një kontratë të shumëpërfolur me Rusinë për zgjerimin e një centrali bërthamor, nxiti me forcë sot Bashkimin Europian për të rindërtuar lidhjet pragmatike me Moskën.

"BE duhet të rindërtojë lidhjet me Rusinë në një mënyrë pragmatike, sepse BE-ja ka nevojë për energji për zhvillimin e saj të qëndrueshëm", deklaroi kryetari i qeverisë hungareze gjatë një konference në Budapest ku morën pjesë presidentë të bankave qendrore evropiane.

"Ju e dini se personalisht jam një antikomunist i vjetër, por nëse Evropa nuk bën gjithçka që është e mundur për të marrë energjinë që gjendet në Rusi, nuk e di se ku do ta gjejë për të furnizuar ekonominë e saj", tha ai. Orbani është kritikuar mjaft në Hungari për nënshkrimin së fundi të një kontrate me Rusinë rreth zgjerimit të centralit bërthamor hungarez në Paks, mesa duket pa tender dhe pa miratimin e parlamentit.

Kritikët e tij i kujtojnë se kur ishte në opozitë, ai ka qenë kundërshtari më i madh i çdo afrimi pragmatik me Rusinë. Po lidhur me temën e energjisë, ai shprehet se “Europa nuk do të ketë sukses nëse nuk do të jetë e aftë të furnizohet me energji me çmim konkurrues. Dhe për këtë do të duhet të rimarrim në konsideratë rolin e energjisë bërthamore", theksoi ai.

Hungaria, ish-anëtare e bllokut socialist, është shumë e varur nga Rusia për furnizimin me energji, pasi 80 për qind e naftës dhe 75 për qind e gazit të saj vijnë nga Rusia. Na ndiqni dhe në Facebook dhe Twitter

HermesNews - ©2014

Dërgo me email | Stampo artikullin