27/01/2014 10:30:31

Një kg kokainë në Vorë

Policia zbulon trafikun ndërkombëtar të drogës

TIRANË - Policia e kryeqytetit bën të ditur detajet e operacionit të mbasdites së vonë të së djelës, në një servis automjetesh në Vorë, 15 km larg Tiranës, ku u sekuestruan 1 kg kokainë, ndërsa u arrestuan dy persona dhe u shpall në kërkim një i tretë. Në një deklaratë për mediat, Zëdhënësja e Policisë së kryeqytetit, Alma Katragjini bëri të ditur sot në mbrëmje se gjatë momenteve të shkëmbimit të drogës u arrestuan 35 vjeçari Ilir Mara dhe 22 vjeçari Hasan Rezi, që të dy nga Tirana, ndërsa u shpall në kërkim bashkëpunëtori i tyre me iniciale E.K.

Identifikimi dhe arrestimi i këtyre shtetasve, të dyshuar si të përfshirë në trafikun ndërkombëtar të drogës, u bë pas një hetimi 2 mujor, tha Policia. Referuar deklaratës zyrtare, dyshohet se në bashkëpunim me njëri tjetrin dhe persona të tjerë, këta shtetas realizonin trafikun ndërkombëtar të drogës së ardhur nga Hollanda, me destinacion tregun e brendshëm. Bashkë me sasinë e drogës, në ngarkim të dy të arrestuarve, u sekuestrun edhe 15 mijë euro, të dyshuara si të përfituar nga aktiviteti kriminal, si dhe dy automjete.

Hetimi lidhur me këtë ngjarje, Policia tha se është shtrirë edhe në hetimin pasuror të tyre, si asete të mundshme të përfituara përmes krimit. Na ndiqni dhe në Facebook dhe Twitter

HermesNews - ©2014

Dërgo me email | Stampo artikullin