23/01/2014 16:33:06

Toyota, makina me e shitur

Gjiganti me qendër në Nagoya, që ndodhet në qendër të Japonisë, deklaroi sot se kishte arritur të shiste 9,98 milionë automjete të markave të saj të ndryshme

TOKIO - Prodhuesi japonez i automobilave ”Toyota” vazhdon të qëndrojë numri një në botë duke iu afruar 10 milionë automjeteve të shitura për vitin 2013, një barrierë kjo të cilën shpreson ta arrijë këtë vit.

Gjiganti me qendër në Nagoya, që ndodhet në qendër të Japonisë, deklaroi sot se kishte arritur të shiste 9,98 milionë automjete të markave të saj të ndryshme (”Toyota”, automjete të vogla ”Daihatsu”, automjete të rënda ”Hino” dhe vetura luksi ”Lexus”).

Ky rezultat, dy për qind më i lartë sesa në vitin 2012, i jep mundësinë që të kalojë konkurentët amerikanë të ”General Motors” (GM me 9,7 milionë automjete) dhe gjermanët e ”Volkswagen Group” (9,5 milionë automjete).
Grupi japonez për shumë pak nuk arriti dot nivelin simbolik të 10 milionë automjeteve të shitura në një vit, nivel ky që nuk është kaluar ndonjëherë nga asnjë prodhues gjatë historisë së automobilave.

Por ”Toyota” parashikon ta arrijë këtë nivel në vitin 2014, me 10,32 milionë automjete të shitura (pra 4 për qind më shumë) dhe me një rritje në tregun kinez që pritet të jetë 20 për qind.

“Forca e ‘Toyota’-s qëndron në aftësinë e saj për të ndërthurur tre çelësat e suksesit, shumëllojshmëria e automjeteve të prodhuara, burimet e shitjeve dhe konkurenca në aspektin e çmimeve. Ajo arrin t’i balancojë më mirë faturat e veta sesa konkurentët e tjrë”, vlerësoi Shotaro Noguchi, ekspert i sektorit të sigurisë tek “SMBC Nikko Securities”. Na ndiqni dhe në Facebook dhe Twitter

HermesNews - ©2014

Dërgo me email | Stampo artikullin