08/01/2014 19:38:48

Urdhri i ri: konkurse për drejtorë dhe mësues

Së shpejti do të nisin në të gjithë shkollat 9 vjeçare dhe të mesme konkurset për drejtorët e shkollave, ku në konkurim mund të marrin pjesë dhe drejtorë aktualë apo dhe zëvendësdrejtorë

TIRANË - Konkurse për mësuesit dhe drejtorët e shkollave. Muaji Janar do të sjellë ndryshime në shkollat e vendit. Krahas konkurseve për përgjedhjen e drejtuesve të institucioneve arsimore, do të zhvillohen dhe konkurset për mësuesit. Së shpejti do të nisin në të gjithë shkollat 9 vjeçare dhe të mesme konkurset për drejtorët e shkollave, ku në konkurim mund të marrin pjesë dhe drejtorë aktualë apo dhe zëvendësdrejtorë.

Kandidatët pas dorëzimit të dokumentacioneve që vërtetojnë kualifikimet e tyre profesionale, do t`i nënshtrohen procesit të intervistimit. Gjithashtu kandidatët do të paraqesin dhe një projekt konkret për rritjen e cilësisë së mësimdhënies dhe përmirësimit të jetës sociale të nxënësve. Përzgjedhja e drejtuesve të shkollave do të bëhet sipas ligjit të arsimit parauniversitar, ku drejtuesi nuk është vetëm mësues me përvojë dhe aftësi të mira komunikuese, por dhe një administrator.

Përsa u përket mësuesve, procesi i emërimeve do të zëvendësohet nga konkursi përmes dosjeve të tyre të kualifikimit.Fillimisht konkursi do të zhvillohet për vendet vakante, e më pas me zëvendësimet. Përzgjedhja e mësuesve të rinj do të bëhet nga një komision i përbërë nga drejtoria rajonale, komuniteti i mësuesve, komuniteti i prindërve, qeveria e nxënësve.

Në fund të dhjetorit, të gjithë institucioneve arsimore u është kërkuar nga Drejtoritë Arsimore Rajonale të grumbullojnë dosjet me diplomat e çdo mësuesi për t`iu nënshtruar një kontrolli të detajuar. Kjo reformë përfshin edukatorë të arsimit parashkollor si dhe mësuesit e ciklit 9-vjeçar dhe të mesëm. Na ndiqni dhe në Facebook dhe Twitter

HermesNews - ©2014

Dërgo me email | Stampo artikullin