31/12/2013 11:42:09

Një aktiviste e Femen në topless në Meshën e Katedrales së Këlnit

Mesha e Krishtlindjes në Katedralen e Këlnit u ndërpre nga protesta e bujshme e një aktivisteje gjermane të lëvizjes Femen

BERLIN- Mesha e Krishtlindjes në Katedralen e Këlnit u ndërpre nga protesta e bujshme e një aktivisteje gjermane të lëvizjes Femen, me parime feministe, e cila u ngjit në topless në altarin e Katedrales ku celebrohej Mesha.

Kardinali Joachim Meisner po përgatitej për të mbajtur predikimin e Krishtlindjes në momentin kur njëzet vjeçarja Josephine Witt, pasi hoqi një pallto prej lekure, u paraqit pranë altarit në topless ku shkruhej “I am God” dhe duke thënë mes të pranishmëve: “Unë besoj në vetëvendosjen e lirë të gruas”.

Pas ndërhyrjes së menjëhershme të njerëzve të Katedrales për të ndaluar aktivisten feministe guximtare, ajo u denoncua për thyerje të funksioneve religjoze dhe u lëshua pas një ndalimi të shkurtër nga ana e policisë.

Ndërkohë kardinali Meisner, i cili pikërisht ditën e Krishtlindjes mbushte 80 vjeç, dukej i paprekur nga ngjarja dhe sapo u lirua altari vazhdoi funksionin e tij religjoz, madje duke përfshirë edhe aktivisten feministe në lutjen e tij.

Nga ana tjetër duhet nënvizuar fakti se Josephine Witt është e njohur tashmë për aktet e saj në publik në mbrojtje të të drejtave dhe lirisë së femrës, aspekt i cili anashkalohet madje edhe në shoqërinë tonë moderne të super civilizuar të pothuajse 2014-ës, dhe të drejtat e emigrantëve të shfrytëzuar dhe njëkohësisht të përbuzur në vendet e “civilizuara” të Europës perëndimore.

Në fakt, Witt me 11 dhjetor ndërmori një tjetër iniciative të ngjashme duke u paraqitur në televizionin publik gjerman Zdf ndërkohë që mbahej talk show “Markus Lenz” me të pranishëm Giovanni Trapattoni dhe ish futbollisti Thomas Strunz, me të cilin ishte e armiqësuar që nga koha kur Strunz ishte stërvitës i Bayer Monaco-s.

Në atë rast, Witt qe paraqitur në studio gjysmë e zhveshur dhe me dy topa futbolli që kullonin gjak të vizatuar në gjoks, në shenjë proteste kundër shftytëzimit të punëtorëve emigrant që po ndërtojnë në Qatar instalimet për vendin ku do të mbahet kampionati botëror në vitin 2022.

Në qershorin e shkuar protestoi së bashku me katër koleget e saj në Tunizi kundër arrestimit të një tjetër aktivisteje të Femen dhe në atë rast qe dënuar me 29 ditë burgim.

Daniela Vathi

Dërgo me email | Stampo artikullin