26/12/2013 18:22:24

Kërcënimet e ish gardistit: sot masa e sigurisë me burg për Fatos Skeja

Biznesmeni denoncon telefonatat anonime për ''gjoba''

TIRANE - Gjykata e Shkallës së Parë vendosi masën "arrest me burg" për ish-gardistin Fatos Skeja 38 vjeç dhe bashkëpunëtorin e tij Gojart Loci, 33 vjeç.

Loci tha sot para trupit gjykues se nuk kishte njohje me gardistin Skeja dhe se nuk e ka pasur në përdorim asnjë makinë, me të cilën u morën paratë e një biznesmeni, por Prokuroria tha se në automjet u gjendën fije floku të Locit.

Nga ana e tij Skeja nuk ka pranuar asnjë akuzë. Arrestimi i Skejës është bërë pas vendimit të gjykatës, e cila ka vendosur masën “arrest me burg” për gjobëvënie.

Ish-truproja i familjes Berisha, pjesë e “grupit të zjarrit” në ngjarjen e 21 janarit, akuzohet se ka gjobitur me 100 milionë lekë biznesmenin shqiptaro-amerikan, Ramazan Hima.

Ngjarja ka ndodhur në muajin gusht të këtij viti, ku biznesmeni nga Kalaja e Dodës, me banim në Shtetet e Bashkuara të Amerikës, ka denoncuar se persona të paidentifikuar i kishin vënë gjobë 100 mijë euro.

Ai ka deklaruar për policinë se prej vitesh jeton në SHBA, ku ka në pronësi tre hotele dhe që me anë të telefonit, e kishin kërcënuar me jetën e familjarëve të tij, duke i kërkuar 100 mijë euro.

Madje, ai ka shpjeguar se autorët e kishin kërcënuar seriozisht me jetë, duke i lënë të kuptojë se ia njihnin mjaft mirë familjen, dhe e kanë urdhëruar të paguajë paratë dhe mos të njoftojë policinë. Në këto kushte, denoncuesi ka kërkuar ndihmën e policisë për identifikimin e autorëve të shantazhit që po kryhej ndaj tij.

Policia e Tiranës dhe Prokuroria e Krimeve të Rënda kanë nisur hetimet për zbardhjen e ngjarjes. Nëpërmjet forcave të sektorit të operacioneve speciale u organizua aksioni për “dorëzim të kontrolluar” të parave në afërsi të malit të Dajtit.

Paratë janë lënë pranë rrugës që të çon drejt malit të Dajtit dhe policia ka mbajtur nën vëzhgim zonën. Pas kësaj ka nisur aksioni për kapjen e autorëve. Një makinë, në të cilën udhëtonte vetëm një person, i është afruar vendit ku ishte lënë çanta me para, e ka marrë dhe është larguar.

Policia i është vënë pas, por autori duket se ka nuhatur ndjekjen dhe e ka braktisur mjetin bashkë me paratë. Nga verifikimi i automjetit që ka përdorur autori ka rezultuar se ishte në pronësi të prokurorit të Shkodrës, Xhevahir Lita.

Grupi hetimor ka kontaktuar me të në lidhje me makinën dhe ai ka deklaruar se ia kishte shitur ish- gardistit Fatos Skeja. Skeja dhe Loii po hetohen nga Prokuroria e Krimeve të Rënda. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin