19/12/2013 18:28:36

Cani, të kontribuojmë për uljen e borxhit

Për vitin 2014 parashikohet një rritje reale ekonomike prej 2.1%. A penalizohen konsumatorët dhe investitorët nga rritja e taksave ?

TIRANË - Ministri i Financave, Shkëlqim Cani, i cili paraqiti të enjten në Komisionin e Ekonomisë buxhetin e vitit 2014 tha se ditë më të mira do të vinë për ekonominë e Shqipërisë dhe se të ardhurat do të rriten me 42 miliardë lekë.

"Në përgatitjen e buxhetit të ri nuk presim mrekulli, por realizëm, disiplinë të fortë fiskale dhe buxhetore, ndryshim mentaliteti në përdorimin e fondeve publike, përgjegjësi dhe transparencë", tha ai.

Ky buxhet, sipas tij, ka rritje prej 14.5 % kundrejt atij të 2013-ës.

Rivendosja e ekuilibrave makroekonomikë, si sjellja e defiçitit buxhetor në kufirin e 3% të PBB-së dhe ulja e borxhit publik në maksimum 60% kërkojnë një program afatmesëm që të gjithë do të duhet të kontribuojnë.

Buxheti i vitit 2014, sipas tij, ka mbështetjen dhe konsulencën e plotë të FMN-së dhe BB-së për të garantuar rivendosjen e stabilitetit makroekonomik dhe të garancive makroekonomike për një zhvillim të qëndrueshëm afatgjatë.

Fryma që karakterizon buxhetin e ri, u shpreh ndër të tjera ministri, kërkon të mësohemi me një mënyrë të re jetese dhe sjellje ndaj financave publike. Kjo mënyrë e re, tha ai, kushtëzohet nga dështimet dhe pësimet e së shkuarës, nga papërgjegjshmëria dhe euforia e shifrave dhe shkëlqimi i rremë i arritjeve dhe ritmeve të rritjes ekonomike nga qeveria e shkuar.

Për vitin 2014 parashikohet një rritje reale ekonomike prej 2.1%, ndërsa nominale rreth 3 %. Borxhi publik, parashikohet në 74.8% të PBB-së. "Ky do të jetë kufiri i stabilizimit", tha ai.

"Është hequr dorë nga parashikimet jorealiste dhe nga euforia e tepruar e shifrave të paverifikuara. Ky buxhet është fryt i një pune tre mujore me ekspertët e FMN-së dhe BB-së dhe gjithë aktorët e tjerë institucionalë të qeverisë", theksoi ai. Buxheti parashikon shlyerjen graduale të stokut të detyrimeve të krijuara.

"Borxhi i fshehur që vetëm qeveria ka ndaj biznesit deri tani arrin në rreth 5% të PBB-së. Fillon ripagimi i tij me synim shlyerjen deri 350 milionë dollarë të këtij borxhi për punë e shërbime publike të kryera nga biznesi për qeverinë qendrore, si dhe për shlyerje të detyrimeve të prapambetura ndaj biznesit për TVSH-në apo fitim të parapaguar, por të pashlyer në vitet e shkuara", deklaroi Cani.

Përmes këtj buxheti socialistët synojnë vendosjen e një sistemi të shëndetshëm të menaxhimit financiar dhe nuk do të lejojnë krijimin dhe mbartjen e detyrimeve të reja financiare (të papaguara), kryesisht ndaj biznesit.

"Financat publike do të ndeshen me një sërë masash të reja shtrënguese dhe monitoruese për të mos lejuar përsëritjen e fenomenit të krijimit të detyrimeve të reja të papaguara në kohë. Paketa e masave parandaluese të moskrijimit të detyrimeve të reja të papaguara për vitin 2014 është prioritet për garantimin e rivendosjes së stabilitetit makroekonomik. Këto masa, të shoqëruara me masat dhe proçedurën për ripagimin e borxhit të fshehur, janë veçori për buxhetin e vitit 2014", nënvizoi Cani.

Ky buxhet, tha ai, mbështet sektorë prioritarë, si arsimi, shëndetësia, bujqësia dhe infrastruktura. Qeveria për herë të parë vendos një target ose një kufi ose pikësynim shumë agresiv lidhur me luftën ndaj informalitetit, korruspionit dhe evazionit fiskalë.

"Ne kemi rritje të të ardhurave në vitin 2014-të aq sa ka qënë tempi mesatar i rritjes të të gjithë të ardhurave nga të tatimet dhe doganat gjatë 10 vjeçarit të fundit, ku unë dua t'iu kujtoj se një 5 vjeçar ka qënë me rritje 6% ku ekonomia ka qënë në lulzim, se ne jemi në një fazë shumë kritike të ekonomisë dhe kjo është veçoria e këtij buxheti, por agresiv në kapërcimin e situtës të cilën ne gjykojmë që 6 -mujori i dytë do të jetë optimist për ekonominë shqiptare", deklaroi Cani.

Viti 2014, është një vit që kërkon reformim tërësor dhe ne kemi një programim për këtë çështje, një program i tërë i reformave në admisnitratën doganore e tatimore që kanë filluar, por efektet do ta kenë gjatë vitit 2014. Një objektiv i yni është bashkimi i doganave me tatim taksat. Për këtë, tha Cani, gjatë 2014-ës do t'u parashtrojmë veprimet.

Për ish ministrin e financave Ridvan Bode, buxheti i vitit 2014 rrit taksat për konsumatorin dhe investitorët.

"Do të jetë biznesi i cili do të paguajë L7 miliardë më shumë dhe kjo do të bëjë që të pakësohet kapaciteti i tij për të inevstuar". Demokratët thonë se kjo do të ndikojë në rënien e punësimit të qytetarëve pranë bizneseve.

Qeveria ka hedhur sytë në të gjithë prodhimin e vendit, "duke bërë që qytetari të mos mund të kursejë asgjë sepse gjithçka do ta mbledhë qeveria", tha Ridvan Bode.

A do ta përmirësojë qeveria administrimin e të ardhurave ?

"Nuk do të rritet konsumi për shkak se nuk do të rriten pagat dhe pensionet, ashtu si nuk ka shenjë të rritjes së investimeve të huaja, pasi janë rritur 50 % taksat. Viti 2014 është fillimi i rrokullisjes së ekonomisë. Qeveria nuk ka asnjë model zhvillimi", deklaroi Bode.

Kjo u kundërshtua nga relatori i buxhetit, Anastas Angjeli, pasi sipas tij, natyrisht që të ardhurat do të merren nga buxheti, pasi qeveria ka skenarin e vet të administrimit të të ardhurave për t'i kthyer përmes politkave të tjera që do të bëjë.

Deputeti i PS-së, Ervin Koçi, i kërkoi ministrit Cani hetime për kontratën e kredisë së marrë në vitin 2008 për Rrugën e Kombit me normë interesi 15 % duke i shkaktuar një dëm të madh publikut, sepse norma e tregut në tregun bankar nuk ka qënë më shumë se 10 % në valutë. Po ashtu ai kërkoi edhe hetime për tre koncensione të dhëna nga qeveria e mëparshme.

"Kërkoj publikisht të shikohen tre koncensione, atë të pullave të akcizës, me dëm 15 milionë euro në vit, koncensioni i skanimit të automjeteve në dogana me dëm ekonomik 15 milionë euro dhe ngjyrosja e karburantit me dëm ekonomik 15 milion euro. Janë tre koncensione që dëmtojnë rëndë interesin publik dhe nëse kërkohet të ngrihet komision hetimor që të gjthë ata që kanë marrë pjesë në këto koncensione duhet të jenë pjesë e përgjegjësisë administrative dhe penale", tha Koçi. Treguesit kryesorë makroekonomikë të buxhetit 2014 janë:

Të ardhurat 363,966 ose +42,048 ose 26.1 % e PBB

Shpenzimet 455,566 +54,158 32.9 %

Deficiti 91,600 +12,111 6.6 %

Borxhi publik 1,044,855 +108,389 72.6/74.8 % (arrears)

PBB nominale 1395 - 1.412 +39,767. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin