12/12/2013 18:45:09

Parlamenti Europian miraton dhënien e statusit për Shqipërinë

Me shumicë votash eurodeputetët kanë aprovuar rezolutën për Shqipërinë

TIRANË - Parlamenti Europian miratoi sot rezolutën për Shqipërinë, ku i rekomandon Këshillit të Ministrave të BE-së dhënien e statusit të vendit kandidat.

Me shumicë votash eurodeputetët kanë aprovuar rezolutën për Shqipërinë duke mbështetur vendimin e KE-së për dhënien e statusit të vendit kandidat.

Në rezolutë thuhet se Këshilli duhet ta bëjë Shqipërinë zyrtarisht kandidate për anëtarësimin në BE, pa vonesë. Raportuesi Nikola Vuljaniç ka deklaruar se "po dërgojmë një mesazh unanim ndaj Këshillit: Shqipëria meriton t’i jepet statusi kandidat. Avancoi axhendën e reformave dhe ka arritur një nivel të ri të pjekurisë politike përmes kalimit të duhur të pushtetit në paqe pas zgjedhjeve të qershorit.Jam i bindur se forcat politike dhe populli i shqiptar janë të aftë të kalojnë pengesat e mbetura dhe të përmirësojnë dialogun politik dhe social nëse kanë mbështetjen e BE-së".

Pas këtij vendimi ka reaguar Ministri i Jashtëm, Ditmir Bushati, në rrjetin social “Facebook”, duke i shprehur falenderime PE."Faleminderit Parlamentit Europian per vullnetin politik të shprehur për t’i dhënë Shqipërisë statusin kandidat".

Pas këtij vendimi, edhe Partia Demokratike, ka reaguar nëpërmjet deputetes Majlinda Bregu e cila u shpreh se në rezolutën e miratuar vlerësohet standardi i lartë i zgjedhjeve të fundit dhe tranzicioni i butë politik i realizuar nga Partia Demokratike. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin