03/12/2013 16:32:15

Korrupsioni në të gjitha nivelet

Çuçi publikon strategjitë antikorrupsion që do të merren gjatë katër viteve

TIRANË - Ministri i Shtetit për Çështjet Vendore, Bled Çuçi, gjatë një seance në komisionin parlamentar të Integrimit, komentoi rezultatin e raportit të fundit të "Transparency International'.

"Shqipëria gjithnjë e më tepër po zbret në indeksin e perceptimit të korrupsionit, indeks i përgatitur nga 'Transparency International'. Kjo na bën që të përforcojmë akoma më tepër masat dhe të rrisim angazhimin për luftën kundër korrupsionit, si një fenomen, i cili po gërryen çdo ditë e më tepër shoqërinë shqiptare dhe shtetin shqiptar", tha Çuçi.

Deputeti socialist Taulant Balla theksoi se ky raport dëshmon për nivelin e lartë të korrupsionit në strukturat shtetërore dhe ky rezultat na ka çuar sërish në vitin 2005. "Shqipëria nga 2005 në 2013-n, pati një kurbë që fillon dhe mbaron atje ku ishte. Korrupsioni në Shqipëri është në të gjitha nivelet. I referohem gjithashtu edhe letrës së djeshme të misionit të OPDAT-it pranë ambasadës së SHBA-së në Tiranë, që thotë se korrupsioni në Shqipëri është më i madh se sa niveli i statistikave", tha Balla.

Kryetarja e komisionit të Integrimit, Majlinda Bregu, kërkoi hollësi mbi strategjinë që po harton Ministri i Shtetit për Çështjet Vendore dhe rolin që do të ketë koordinatori. Sipas saj, një pike delikate mbetet financimi i partive politike.

"Uroj shumë që të jetë në vëmendje të kësaj maxhorance transparenca e financimit të partive politike. Për të shmangur pastaj dhe për të prerë fijet e atij korrupsioni politik, siç ndodhi në rastin e fundit në zgjedhjet lokale në Korçë me blerjen e votave", tha Bregu.

Ministri Çuçi sqaroi se strategjia parashikon masat që do të merren gjatë katër viteve, ndërkaq koordinatori do të jetë i detyruar që për periudha të caktuara kohore të raportojë në komision. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin