28/11/2013 18:23:07

Frymezohemi nga sakrificat e të parëve

nga Lulzim Basha

TIRANE - Në këtë ditë të shënuar të kombit tonë 28 nëntorin, festojmë ngritjen e flamurit dhe mirënjohjen e krenarinë e thellë kombëtare...para atyre, mijëra e mijëra dëshmorëve. Sot i kujtojmë këta martirë, veprën e tyre, kujtojmë sakrificat sublime me të cilat i shërbyen kombit të tyre, për të mbetur përjetë të pavdekshëm jo vetëm në historinë tonë kombëtare por edhe në shpirtrat e kombit dhe popullit të përjetshëm shqiptar.

Kujtojmë babain e Pavarësisë Ismail Qemal Vlorën dhe gjithë bashkëpunëtorët e tij, të cilët 101 vjet më parë, përkundër vështirësive dhe sfidave të panumërta, ia dolën t’i dështojnë projektet për asgjesimin e kombit shqiptar dhe të shpallin Pavarësinë në Vlorë, kujtojmë sakrificën e qindra e mijëra shqiptarëve të tjerë për të konsoliduar shtetin e sapolindur shqiptar.

Kujtojmë sakrificën e mijëra dëshmorëve të Luftës Nacional Çlirimtare që dhanë jetën për çlirimin e Shqipërisë dhepër rrugëtimin e saj, si një vend i lirë dhe demokratik, rrugëtim I cili për fat të keq për 5 dekada me rradhë, u tradhëtua dhe bashkë me të edhe idealet e lirisë e demokracisë.

Kujtojmë dëshmorët e demokracisë të cilët bënë të mundur përfundimin me sukses të kësaj ëndrre shekullore që përbën edhe ribashkimin e shqiptarëve me familjen e madhe të vlerave dhe lirisë dhe demokracisë, familjes europiane e euroatlantike.

Kujtojmë bijtë e shqipes në Kosovë, Preshevë, Maqedoni, që dhanë jetën e tyre për lirinë e Kosovës, për pavarësinë e saj dhe për të drejtat e shqiptarëve në trojet e tyre stërgjyshore.

Përkulemi me nderimin më të thellë para kësaj sacrifice, por kjo është po kështu një ditë për të kujtuar se përgjegjësitë tona nuk kanë mbaruar. Bazuar mbi këtë gur themeli të vaditur me sakrifica sublime dhe gjakun e mijëra dëshmorëve ta çojmë përpara projektin e Shqipërisë dhe shqiptarëve si një faktor i rëndësishëm paqe, stabiliteti por, edhe si një nga kombet më të vjetra të qytetërimi europian, destinacioni I të cilëve është pa dyshim, Europa.

2013-a, është 101 vjet pas shpalljes së Pavarësisë dhe 100 vjet pas vitit fatkeq 1913, që na kujton se shpesh sakrificat nuk mbarojnë me aktet e mëdha por ato duhet të vazhdojnë.

Le të jetë ky pra një burim frymëzimi për të gjithë shqiptarët veçanërisht për vendimarrësit që me kurajo dhe përkushtim të marrin vendimet e duhura për t’I shërbyer në rradhë të parë kombit, vendit, qytetarëve shqiptarë dhe për të lënë mënjanë interest meskine personale e për të ngritur në piedestal, interest kombëtare.

Uroj që akti i djeshëm i miratimit të Rezolutës propozuar nga Partia Demokratike për të mbështetur Statusin kandidat, si një hap i rëndësishëm dhe në përputhje të plotë me aspiratat e të gjithë atyre që u flijuan për Pavarësinë e Shqipërisë të mos mbetet një akt simbolik dhe i veçuar dhe uroj që kjo ditë të shërbejë për të ndërgjegjësuar të gjithë klasën politike shqiptare dhe të gjithë shqiptarët kudo që jetojnë, për përgjegjësitë e mëdha që na presin, për përgjegjësitë e një gjenera te e cila duke ia marrë frymëzimin nga sakrificat e shumta që çuan deri ditën e sotme, ditën e Pavarësisë së Shqipërisë, ditën e Pavarësisë së Kosovës, ditën e hyrjes në NATO, ditën e dinjitetit të shqiptarëve që të lëvizin pa viza në Europë, të vazhdojmë të përmbushim me besnikëri të plotë ndaj këtyre idealeve të gjitha detyrimet tona për të plotësuar kilometrat e mbetura për ribashkimin e plotë politik të Shqipërsë me Europën. Gëzuar 28 nëntorin! Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin