21/11/2013 10:37:01

Vdekja e Olldashit; sot homazhet ne Parlament

Në orën 14:00 do të zhvillohet ceremonia e përcjelljes së trupit drejt banesës së fundit

(15:00) Trupi i pajetë i deputetit demokrat Sokol Olldashu, u përcoll për në varrezat e Sharrës në Tiranë.

(12:45) Bashkia e Tiranës ka vendosur që flamujt në kryeqytet të ulen në gjysmë shtizë gjatë periudhës së homazheve për deputetin e Partisë Demokratike, Sokol Olldashi, i cili humbi jetën mbrëmjen e kaluar, si pasojë e një aksidenti në aksin rrugor Tiranë-Elbasan.

Homazhet në nderim të deputetit Sokol Olldashi (fotot e homazheve në Parlament) do të bëhen në Kuvendin e Shqipërisë në orën 11:00 ndërsa ceremonia e varrimit do të bëhet në orën 14:00.

Sokol Olldashi humbi jetën në një aksident rrugor në rrugën Elbasan-Tiranë, pranë lapidarit të Kërrabës ndërsa kthehej nga Elbasani në orën 21.15. Moti i keq, me reshje të dendura shiu, dhe ndoshta shpejtësia bënë të pamundur mbijetesën e tij. Olldashi ka qenë deputet i Kuvendit të Shqipërisë prej vitit 2001.

Ai ka qenë po ashtu ministër i Brendshëm dhe ministër i Transportit dhe Telekomunikacionit. Lidhur me dinamikën e aksidentit priten edhe detaje nga Policia e Tiranës, e cila ka njoftuar se do të dalë në një deklaratë për mediat.

(12:30) Seanca e sotme plenare e Kuvendit të Republikës së Kosovës nisi me deklarime jashtë rendit të ditës, me shprehjen e ngushëllimeve të deputetëve, nga të gjitha grupet parlamentare, për shuarjen tragjike të deputetit të Kuvendit të Republikës së Shqipërisë, Sokol Olldashi, ne nje aksident rrugor në Tiranë, duke shprehur dhembjen për këtë humbje të madhe të përbashkët.

(12:27) Menjëherë pas aksidentit të rëndë që ndodhi naten e kaluar në aksin rrugor Tiranë- Elbasan, ku humbi jetën deputeti i Partisë Demokratike Sokol Olldashi, një grup i gjerë hetimor nisi hetimet në vendin e ngjarjes.
Pjese e këtij grupi ishin edhe drejtues të Policisë së Shtetit.

Makina e aksidentuar, me te cilen udhëtonte deputeti Sokol Olldashi, u nxorr rreth mesnatës nga gremina. Mjeti do t`i nënshtrohet një ekspertimi tekniko- shkencor për të hedhur me tepër dritë rreth shkaqeve të aksidentit. Sakaq, ekspertët rrugorë do të ekspertojnë dhe mbi kushtet e rrugës.

Deputeti i Partisë Demokratike, Sokol Olldashi, humbi jetën mbrëmjen e vonë të së mërkurës në aksin rrugor Tiranë- Elbasan. Aksidenti ndodhi rreth orës 21.18, pranë lapidarit të Kërrabës, kur automjeti tip Benz, që drejtohej nga deputeti Olldashi ka dalë nga rruga dhe ka rënë rreth 20 metra në greminë, duke shkaktuar vdekjen e deputetit Olldashi. Në momentin e aksidentit, kishte reshje të dendura shiu.

TIRANË - Ceremonia e homazheve për deputetin Sokol Olldashi, i cili humbi jetën mbrëmjen e se merkures në një aksident tragjik në aksin rrugor Tiranë - Elbasan, do të zhvillohet sot në orën 11:00, tek Kuvendi i Shqipërisë. Ndërsa në orën 14:00 do të zhvillohet ceremonia e përcjelljes së trupit drejt banesës së fundit.

Deputeti i Partisë Demokratike, Sokol Olldashi, humbi jetën në një aksident tragjik mbrëmjen e vonë të së mërkurës në aksin rrugor Tiranë- Elbasan. Aksidenti ndodhi rreth orës 21.18, pranë lapidarit të Kërrabës, kur automjeti tip Benz, që drejtohej nga deputeti Olldashi ka dalë nga rruga si pasojë e motit të keq, me reshje të dendura shiu dhe ka rënë rreth 50 metra në greminë, duke shkaktuar humbjen e jetës së deputetit Olldashi, 40 vjeç.

Në vendngjarje shkuan një numër i konsiderueshëm deputetësh të Partisë Demokratike dhe Partisë Socialiste, kryetari i Parlamentit, Ilir Meta, ministri i Brendshëm, Sajmir Tahiri. Ende nuk dihen shkaqet e aksidentit, por paraprakisht mësohet se koha e keqe dhe terreni i rrëshqitshëm ka ndikuar në humbjen e kontrollit të automjetit.

Policia pas shumë përpjekjesh arriti të nxjerrë nga makina e aksidentuar trupin e pajetë të deputetit Sokol Olldashi, duke e përcjellë në morgun e Qëndrës Spitalore "Nënë Tereza" në Tiranë.

Në morgun e spitalit ndodhen shumë deputetë, miq, shokë e familjarë të Olldashit, ndërkohë që po bëhet ekspertiza mjeko-ligjore. Vdekja e deputetit Sokol Olldashi ka bërë që Kuvendi i Shqipërisë të shtyjë seancën plenare të ditës së sotme për javën e ardhshme.

Këshilli i ministrave shpalli sot ditë zie kombëtare. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin