19/11/2013 19:01:18

Edukata fetare në shkolla: një problem europian në Shqipëri

Intervistë me Myftiun e Shkodrës Imam Muhamed Sytari: projektet sociale, kulturore dhe ekonomike të një prej komuniteteve më të medha fetare në Shqipëri

HermesNews - Influenca e besimeve fetare në jetën e njeriut është padiskutim, e pashmangshme. Por inserimi i edukatës fetare në shkolla, nëpërmjet programeve, nuk është vendosur ende.

Myftiu i Shkodrës Imam Muhamed Sytari insiston në këtë pikë.

Në një bisedë që bëmë sot për Hermesin, Myftiu mendon se në çfarëdo pozicioni në jetë njeriut i duhet edukata fetare në shkollë: një lëndë sigurisht me zgjedhje, por që mund t'i japë një dimension të plotë jetës së njeriut.

Për mënyrën sesi e sheh ai, është padyshim dhe një çështje europiane sepse bën pjesë në të ashtëquajturën, liri e besimit: një praktikë që aplikohet gjerësisht psh në fqinjin tonë përtej Adriatikut (Itali). Në Shqipëri një problem ende i papërpunar nëpër zyrat e Ministrise së Arsimit, së bashku me trajtimin që ekspertët i kanë bërë librit "Vendlindja ime", që imami i Shkodrës e quan jokorrekt në shifra dhe arsyetime për raportin fetar në Shkodër. Detaj shkencor ndoshta i pazbuluar, apo preferenca personale e stafit akademik ?

"Shembujt e bashkëjeteses së mirë fetare nuk mungojnë dhe nga qytetet europiane, ku në Milano në këshillin bashkiak është zgjedhur një vajzë e mbuluar me vel dhe e besimit islam, duke iu bashkangjitur dhe mesazhit të Papës në Vatikan, për një bashkim në fushën e edukimit", thotë imami shkodran, që gjithsesi ka një histori shumë interesante në rrugëtimin e tij fetar.

Shkodra është e dalluar për një bashjetesë të qytetëruar ndërmjet tre komuniteteve fetare siç është ai i besimit mysliman që është më i madhi, besimit katolik, i dyti në numër, dhe ortodoks, i treti. Martesat në kohën e komunizmit, ndërmjet feve të ndryshme, apo ata që në dukje ishin ende fetar, imponoheshin nga kushtet sociale dhe politike.

Një prej emrave më të njohur të kënges popullore shkodrane znj. Violeta Zefi, përtej një shëmbulli të mirë talenti popullor, ka qenë për imamin një vizion i plotë edukate fetare brenda një familjeje myslimane, duke qenë se është as më shumë e as më pak se e ëma e kreut të komunitetit mysliman në veri. Kuptova pse imami i ri sot shprehu aq mirë kuptimin e tolerancës fetare në islam.

Myftinia e Shkodrës ka një varg aktivitetesh fetare, një prej të cilave ishte dhe vizita në burgun e Shën Kollit, apo ruajtja e mjedisit, por sot mora vesh se institucioni hera herës shpreh qëndrimet e tij për çështje të ndryshme, siç ishte ajo për armët kimike.

Përtej paragjykimeve që shumë kush mund të ketë për fenë islame, zbulova se koncepti i femrës është shumë më i gjerë nga trajtimi që disa herë ëshë bërë nëper mediat perëndimore. Me ato minuta që biseduam, ishte evidente që liria e saj ishtë shumë më e plotë nga sa përshkruhet disa herë.

Nëse dikush do të përshkruantë femrën në islam, shpesh herë do ta mbyllte atë në rregulla të hekurta, mbase dhe kundër dëshirës se saj. Zbulova dhe se këto mure të larta, shpesh herë mbase janë një pikëpamje e ngurtë e njeriut që mbështetet mbi të ashtëquajturat steriotipe që i vishen femrës dhe pa të drejtë.

Njohja është fuqi.

Planet e imamit të ri, për aktivitetet fetare janë sa ambicioze por nuk jep kurrë përshtypjen e një njeriu që vrapon me projekte në dorë. Sapo kishte marrë fund një prej problemeve që Myftinia Shkodër e quan të hershëm, siç është ajo e pronave. Asaj i ishin kthyer disa prej tyre në Zogaj (pranë liqenit, në kufi me Malin e Zi). Brenda këtyre hapësirave do të shtrihet puna e artizanatit të hershëm vendas.

Ndërtimi i një platforme-institucion pranë xhamisë në Parrucë, ku do të përfshihet dhe biblioteka, ishte në dukje një plan-projekt tepër ambicioz në vetvete. Në bashkëpunim më ambasadat e vendeve arabe ka shumë inisiativa të tjera në metropolin verior që përtej argumentit fetar, përfshijnë dhe qëllime edukative, arsimore, sociale dhe ekonomike, në një kohë kur njerëzit po i drejtohen gjithnjë e më shumë koncepteve të reja mbi teknologjinë dhe informacionin.

Imami tha së mediat sociale, apo "fjala" siç preferon ta quajë ai në islam është një urë e fortë lidhëse me publikun. Nëse "fjala"do të përdorej për një publik më të gjerë siç është ai i internetit, me padyshim do të sjellë shumë risi dhe një standard të ri pune në komunitet. //HermesNews - ©2013// Na ndiqni dhe në Facebook dhe Twitter

Doriana Metollari

Dërgo me email | Stampo artikullin