31/10/2013 08:29:50

MUSCULAR: Google dhe Yahoo nën kontrollin amerikan

Washington Post citon Edward Snowden për programet e marrjes së të dhënave prej fibrave optike të përdorura nga gjigantët e internetit

WASHINGTON - Agjencia amerikane e sigurisë kombëtare, NSA ka përgjuar të dhënat e qindra milionë përdoruesve të "Google" dhe "Yahoo!", mes të cilëve edhe qytetarë amerikanë, njoftoi e përditshmja amerikane "Washington Post" në faqen e saj të internetit.

Programi i pagëzuar MUSCULAR dhe i operuar bashkarisht me institucionin homolog britanik të NSA-së, GCHQ, u lejon dy agjencive të shërbimeve sekrete marrjen e të dhënave prej fibrave optike të përdorura nga gjigantët e internetit, sipas dokumenteve të cituara nga Washington Post të marra prej ish-konsulentit të NSA-së, Edward Snowden.

Sipas së përditshmes, e cila ka intervistuar edhe zyrtarët e shërbimeve sekrete, programi është një degë sekrete e programit PRISM që i lejon NSA-së të marrë të dhëna përmes urdhërave të gjykatës nga kompanitë e teknologjisë së lartë.

Sipas një dokumenti të publikuar nga e përditshmja më 30 janar 2013, rreth 181 milionë elementë ishin mbledhur deri në atë datë gjatë 30 ditëve paraardhëse, nga të dhënat e postës elektronike deri tek dokumentet me tekst, ato audio dhe ato video. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin