18/10/2013 12:15:23

Alarm i ekonomisë shqiptare: situata si në vitin 1997

Probleme me mbledhjen e të ardhurave tek doganat: Cani, administrata e doganave do të ristrukturohet. Reagon opozita, ''po rrisni borxhin !''

TIRANE - Akti normativ për ndryshime në buxhetin e shtetit për vitin 2013 ka ngjallur debate në Komisionin parlamentar të ekonomisë dhe financave, ku i pranishëm është ministri i financave, Shkëlqim Cani. Sipas tij situata e financave publike është e vështirë. "Deri në fund të vitit do të mblidhen 38.8 miliardë lekë më pak të ardhura nga planifikimi në fillim të vitit. Rritja eknomike, parashikohet të jetë për këtë vit 1.3 %, nga 3 % që parashikohej, ndërsa borxhi publik do të shkojë në 69 %.

"Akti normativ vjen me ulje të të ardhurave, me rritje defiçiti dhe për pasojë edhe rritje borxhi. Buxheti reflekton një situatë të pakëndshme, shkurtohen me 38.8 miliardë lekë të ardhurat e këtij viti. Kemi më pak se të ardhurat nominale të vitit 2010. Gjendja në thesar është keq dhe 9 miliardë lekë në pritje për t’u bërë pagesat. Ftoj deputetët e opozitës të jenë pjesë e procesit, është një borxh që qeveria u ka bizneseve. Nuk është hera e parë që jemi në situatë të tillë, edhe në 1997 ishte një situatë e vështirë", tha ministri Cani para deputetëve.

Ministri i Financave, performancën e dobët në mbledhjen e të ardhurave në tatime e dogana ia faturoi performancës së dobët të administratës, duke thënë se për këtë shkak administrata do të ristrukturohet.

Por ndryshimet në buxhet sollën reagimin e deputetëve të opozitës. Ish- zëvendësministër i Financave, deputet i Partisë Demokratike, Sherefedin Shehu, tha se vendimi për rritjen e borxhit publik nga ana e qeverisë do të groposë vendin. "Nuk jeni transparent me ndryshimet që sillni. Flisni për situatë të vështirë, por po e groposni duke rritur borxhin", deklaroi Shehu.

Ai i kërkoi ministrit Cani tabelat krahasuese për buxhetin. "Dua të di çfarë katrahure keni bërë", iu drejtua Shehu ministrit Cani.

Me një akt normativ, që u botua në fletoren zyrtare në datë 9 tetor, qeveria bëri ndryshime të buxhetit të vitit 2013. Në buxhetin për vitin 2013, të ardhurat parashikohen në 321 919 milionë lekë, shpenzimet 405 408 milionë lekë, ndërsa defiçiti 83 489 milionë lekë.

Të ardhurat për buxhetin e shtetit për vitin 2013 janë 252 113 milionë lekë, shpenzimet 335 602 milionë lekë, ndërsa defiçiti 83 489 milionë lekë. Shpenzimet e buxhetit të shtetit, sipas grupeve kryesore, llogariten shpenzimet korrente në masën 256 119 milionë lekë, shpenzimet kapitale 74 283 milionë lekë, fondi rezervë 2 000 milionë lekë, kontingjenca 800 milionë lekë, ndërsa fondi për rritjen e pagave dhe pensioneve llogaritet 2 400 milionë lekë.

Në muajin dhjetor të vitit 2012, kur Kuvendi miratoi p/buxhetin për vitin 2013, niveli i të ardhurave parashikohej rreth 360.7 miliardë lekëve, ose në nivelin 25.2 % të PBB, ndërsa shpenzimet totale buxhetore për vitin 2013 parashikoheshin në masën 409 miliardë lekë ose 28.6 % e PBB-së. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin