17/10/2013 19:53:29

Drejt reformës administrative: financime për territoret, decentralizim

OSBE siguron mbështetje teknike për reformën: BE, kërkon përputhjen e saj me ligjet europiane. Sequi, ''Ne duam që të jemi në gjendje që t'i raportojmë taksapagusve europian se investimet që kanë bërë, kanë përmirësuar jetesën e qytetarëve shqiptarë''

TIRANË - Qeveria shqiptare nis punën për zhvillimin dhe zbatimin e një prej reformave më të rëndësishme, për të cilat është angazhuar, reformën administrative-territoriale. Kjo çështje ishte të enjten në fokus të konferencës kombëtare të mbledhur për këtë qëllim, e organizuar nga Ministria e Çështjeve Vendore dhe OSBE.

Kryeministri Edi Rama në fjalën e tij tha se "puna sot për këtë reformë as nuk fillon nga zero dhe as nuk bëhet mbi një territor të pashkelur, por është një punë që duhet çuar më tej, me një bazë të shëndetshme reflektimi dhe debati, e ballafaquar me eksperiencën më të mirë rreth nesh".

Shqipërisë, vijoi ai, "i duhet sot përgjegjshmëria dhe ndjeshmëria më e lartë e gjithë klasës politike dhe kurajo e një lidershipi sa kombëtar, aq edhe lokal, për t'i dhënë fund një epoke dhe për të hapur një epokë të re, për të jetësuar një reformë administrative-territoriale, që do të jetë radikale".

Reforma administrative-territoriale, theksoi kryeministri, është një promotor absolut i yni dhe ne do të bëjmë çmos ta çojmë përpara, duke e trajtuar sipas qasjes së dokumenteve të BE-së, duke u bazuar në tre pika kyçe.

Së pari, ne do të dialogojmë me të gjithë aktorët, pasi është një proces që duhet dhe do të bëjmë çmos që të jetë gjithëpërfshirës. "Ne do të bëjmë çmos që ajo të realizohet si një qasje e të gjitha forcave politike dhe aktorëve të qeverisjes vendorë, në konsultim me komunitetet, grupet e interesit dhe partnerët ndërkombëtarë", tha Rama.

Së dyti, kompleksiteti në qasje me një synim të përbashkët thjeshtëzim në ndarjen territoriale. "Kjo nuk është reforma e një shumice qeverisëse, por është dhe do të jetë një reformë, ku të gjithë protagonistët e saj të marrin pjesë e të thonë fjalën e tyre. Por, ajo që na takon është që lidershipin tonë ta vendosim në funksion të një reforme, që mund të ketë të adresuar të gjitha ato probleme që e kanë bërë atë të domosdoshme e të pashmangshme", theksoi kryeministri.

Pikë tjetër e reformës do të jetë fuqizimi i hapësirave ekonomike, sociale e vendore në funksion të fuqizimit të vendit. "Thelbi i kësaj reforme synon të bëjë të mundur që financimet tona t'i përgjigjen nevojës së hapësirave vendore si në aspektin ekonomik, social e kulturor. Reforma në vetvete nuk e frenon, por përkundrazi e çliron decentralizimin", theksoi ndër të tjera kryeministri në Konferencë.

Qeveria e re socialiste synon që reforma administrativo-territoriale të jetë një reformë gjithëpërfshirëse, e cila do të rrisë efikasitetin e njësive vendore përmes mirëqeverisjes, rritjes së efiçencës në menaxhimin e burimeve të këtyre njësive, menaxhimin e kapaciteteve, përmirësimin e shërbimeve që u ofrohen qytetarëve, si dhe fuqizimin e qytetarëve dhe komuniteteve. Kjo reformë synon të jetë një gur themeli për organizimin e zgjedhjeve vendore të vitit 2015.

Në konferencë morën pjesë kryeministri Edi Rama, ambasadori i prezencës së OSBE-së, Florian Raunig, ambasadori i delegacionit të BE-së në Shqipëri, Ettore Sequi dhe aktorë të tjerë.

Ambasadori i OSBE në Tiranë, Florian Raunig, i kërkoi qeverisë shqiptare një reformë që të garantojë pavarësi politike dhe financiare. Në konferencën kombëtare ai vlerësoi se kjo reformë është komponent kryesor për të siguruar qeverisje të mirë

Prezenca e OSBE-së është e përfshirë në këtë fushë prej shumë vitesh, duke ofruar mbështetje nëpërmjet vlerësimeve e rekomandimeve për të udhëzuar procesin e reformës. Sipas Rauning, ndarja administrative dhe territoriale e Shqipërisë rezultoi në njësi shumë të vogla të qeverisjes vendore dhe me burime e asete shumë të kufizuara, që në shumë raste e ka bërë shumë të vështirë për pushtetin vendor që të ofrojë shërbime publike efektive për qytetarët e vet.

"Shkalla e vogël ekonomike e shumicës së njësive të qeverisjes vendore i ka bërë ato pothuaj plotësisht të varura nga transfertat që vinë nga qeveria dhe nga burime të jashtme fondesh, pa pothuaj asnjë mjet financiar të pavarur për të mbështetur dhe për të ushtruar demokraci të qëndrueshme në nivel vendor", deklaroi Rauning.

Nevoja për një ndarje të re administrative dhe territoriale, vlerëson Raunig, është idenifikuar nga një sërë ekspertësh kombëtarë dhe ndërkombëtarë si dhe nga organizata ndërkombëtare.

Në këtë drejtim, ai sugjeron që procesi i reformës administrative dhe territoriale në Shqipëri të jetë në përputhje me dispozitat e Kartës Europiane për vetëqeverisjen vendore të Këshillit të Europës. Në veçanti ajo duhet të garantojë pavarësi politike, administrative dhe financiare të pushtetit vendor.

"Proçesi për reformën administrative dhe territoriale, duhet të shmangë fragmentarizimin e vet dhe të ketë dialog për këtë reformë", apeloi sot Ambasadori i BE-së në Tiranë, Ettore Sequi.

I pranishëm në punimet e Konferencës Kombëtare, "Reforma administrativo-territoriale në Shqipëri", Sequi u shpreh se Bashkimi Europian asnjëherë se ka ulur mundësinë për të theksuar se legjislacioni europian do të zbatohet nga njësitë e qeverisjes vendore.

"Progres Raporti më i fundit që doli dje nga Komisioneri Fyle, ka qënë shumë i qartë përsa i përket shqetësimeve lidhur me njësitë e qeverisjes vendore. Të njohura janë edhe shqetësimet përsa i përket të ardhurave, menaxhimit të burimeve njerëzore, kontrollit financiar, transparencës si dhe numri i lartë i stafit me kontrata të përkohshme në njësitë e qeverisjes vendore", deklaroi diplomati i BE-së.

Ai vuri në dukje se reforma administrative dhe territoriale dhe decentralizimi ka evoluar gjatë viteve të kaluara, duke përbërë një shqetësim. Në këtë kontekst, tha Sequi, "BE kërkon që të arrihen objektivat e caktuara. Ne vlerësojmë që qeveria e re dhe vetë ministri Çuçi po i japin rëndësi dhe prioritet kësaj reforme, pasi ky është një prioritet i pashmangshëm për qytetarët shqiptarë që meritojnë të kenë standarde të mira".

Në fjalën e tij, Ambasadori i BE-së nënvizoi se "qeveria qëndrore duhet t'i përgjigjet kësaj sfide, duhet të merret kjo energji që të nxitet edhe nga institucionet e pushtetit vendor. Esenca përfundimtare e kësaj reforme është produkti përfundimtar që duhet të zotërohet nga ata, të cilët do të zbatojnë në praktikë, konsultimet dhe bashkëpunimi midis autoriteteve të pushtetit vendor është thelbësor në këtë reformë".

"Ne do të donim të shihnim përgatitjen për draftimin dhe zbatimin e kësaj strategjie për reformën, të shkojë krah për krah me zbatimin e ligjit për shërbimin civil dhe planin për decentralizimin fiskal", theksoi Ambasadori Sequi.

Ai vuri në dukje se "planifikimi urban dhe menaxhimi i mbetjeve, që janë shumë të rëndësishme për pushtetin vendor, duhet të jenë temë edhe në seminaret që do të zhvillohen në nivel vendor gjatë gjysmës së parë të vitit 2014".

"BE ka dhënë mbi 100 milion euro fonde gjatë programit IPA gjatë viteve 2007-2013 për infrastrukturën, kanalizimet, promovimin e turizmit dhe trashëgimisë kulturore. Ne duam që të jemi në gjendje që të raportojmë taksapagusve europian se investimet që kanë bërë, kanë përmirësuar jetesën e qytetarëve shqiptarë", theksoi ai. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin