17/10/2013 19:07:51

Kreu i ri i CEZ, nesër shpallet fituesi

Në garë hynë me aplikime 8 kandidatë, nga të cilët 4 nuk i plotësonin kushtet pasi kishin më pak se 5 vite eksperiencë

TIRANE - Bordi i komisionerëve të ERE-s do të vendosë nesër fituesin për të drejtuar si administrator shoqërinë CEZ Shpërndarje, njoftoi sot ERE. Sot ky bord zhvilloi seancën e dëgjimit të kandidaturave, që konkurojnë për këtë post, në prani të kreut të ri Petrit Ahmeti. Në garë hynë me aplikime 8 kandidatë, nga të cilët 4 nuk i plotësonin kushtet pasi kishin më pak se 5 vite eksperiencë, u shpreh Eduard Elezi, drejtori juridik i ERE-s. Fituesi do të përzgjidhet mes 3 kandidaturave për postin e administratorit të CEZ-it, Arqile Kokëdhima, Arben Seferi dhe Myrteza Myftari.

Gjatë prezantimit të platformës së tij sot para bordit të ERE-s, kandidati Arqile Kokëdhima, me profesion inxhinier ushtarak, tha se synon të ulë nivelin e humbjeve në rrjet dhe përmirësimin e furnizimit me energji. Kandidati Myrteza Myftari tha se synon stabilizimin e kompanisë CEZ , duke rritur të ardhurat dhe duke ulur shpenzimet. Ndërsa kandidati Arben Seferi, pasi deklaroi se nuk ka asnjë konflikt interesi për të ushtruar detyrën si administrator i CEZ, premtoi se do të rrisë performancën e kompanisë dhe do të rakordojë borxhet mes KESH dhe OST.

Para dy javësh, gjatë raportimit në ERE për ecurinë e punës në krye të CEZ Shpërndarje, administratori Sait Dollapi dha dorëheqjen, që u pranua disa orë më pas nga ERE, që shpalli menjëherë garën për këtë post. Na ndiqni dhe në Facebook dhe Twitter

　

HermesNews - ©2013

Dërgo me email | Stampo artikullin