17/10/2013 16:48:22

Më shumë besim ndaj ekonomisë

BSH publikon raportin

TIRANE - Banka e Shqipërisë ka publikuar vrojtimin më të fundit mbi indeksin e besimit të biznesit dhe konsumatorëve në tremujorin e tretë të këtij vitit. Sipas raportit, treguesi i ndjesisë ekonomike (TNE) shënoi nivelin 87.9 në tremujorin e tretë të vitit 2013, në rritje me rreth 10.3 pikë përqindjeje.

Niveli aktual qëndron rreth 12.1 pikë përqindje nën mesataren afatgjatë. Përmirësimi i treguesit të ndjesisë ekonomike, në këtë periudhë, u ndikua kryesisht nga rritja e ndjeshme e besimit në sektorin e shërbimeve. Në të njëjtin drejtim, por në një masë më të vogël, ndikoi dhe rritja e besimit në sektorin e industrisë.

Nga ana tjetër, përkeqësimi i shënuar në treguesin e besimit të ndërtimit dhe të konsumatorit kontribuoi negativisht në treguesin e përgjithshëm për ekonominë.

Treguesi i besimit në sektorin e industrisë u përmirësua me rreth 1.5 pikë përqindje, në tremujorin e tretë të vitit 2013. Rritja e treguesit të besimit në këtë sektor u përcaktua nga përmirësimi i shënuar në balancën e prodhimit industrial me rreth 7.8 pikë përqindjeje. Rreth 11.4% e bizneseve në sektorin e industrisë kanë kryer investime të reja në gjashtë muajt e fundit.

Investimet e reja u përqendruan kryesisht në blerjen e pajisjeve teknologjike. Për gjashtëmujorin e ardhshëm, 14.7% e bizneseve vlerëson të kryejë investime të reja në struktura dhe pajisje teknologjike. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin