07/10/2013 14:07:28

Nis viti i ri akademik 2013-2014

Për programet e studimit me kohë të pjesshme dhe edukimin në distancë, viti akademik do të fillojë në datën 21 tetor 2013

(14:48) Universiteti "Aleksandër Xhuvani" i Elbasanit çeli sot vitin e ri akademik 2013-2014 me një numër më të madh të programeve të studimit dhe të studentëve. Në ceremoninë e organizuar me këtë rast ka qenë i pranishëm edhe kryetari i PD, Lulzim Basha (foto).

Në fjalën e tij përshëndetëse, rektori Liman Varoshi e cilësoi praninë e kreut të PD jashtë ndikimeve politike, por thjesht si një mbështetes i përhershëm i këtij universiteti. Ai e vuri theksin tek arritjet e këtij universiteti si dhe numrin e madh të programeve që ka ky universitet për këtë vit të ri akademik.

“Brenda disa ditëve do të bëhen funksionale edhe ambientet e reja të ndërtuara pranë fakultetit të Infermierisë, duke realizuar pranë këtij fakulteti jo vetëm ambjente të reja dhe të bollshme, por edhe kushte laboratorike dhe praktike tejet të nevojshme për stafin dhe studentët që studjojnë në këtë fakultet”, tha Varoshi.


(14:43) Kryeministri Edi Rama, përmes rrjetit social Facebook, ka uruar të gjithë studentët për fillimin e vitit të ri akademik. Në urimin e tij Rama është shprehur se, “në këtë fillimvit të ri akademik dua t’i uroj studentëve forcë ëndrrash, synimesh dhe kurajo për të ecur drejt të nesërmes pa u tërhequr nga vështirësitë”. Sipas kryeministrit, “Jetësimi i ëndrrave dhe realizimi i synimeve të tyre është jetësimi i Shqipërisë së Gjeneratës tjetër. Është misioni i qeverisë sonë. Me stafin akademik jemi partnerë në këtë mision, i cili orientohet nga forca e aspiratave dhe shpresave të brezave të rinj. Me emocionin e një e kohe të re të filluar për vendin, që përkon me kohën e re të këtij viti akademik, përcjell urimet e përzemërta për sukses të gjithë studentëve dhe për një vit të mbarë të gjithë stafit akademik”, mbyll urimin e tij kryeministri Rama.


(14:00) Viti i ri akademik në Universitetin “Luigj Gurakuqi” të qytetit të Shkodrës ka nisur sot me ceremoninë zyrtare të organizuar në mjediset e rektoratit, ku në praninë e stafeve akademike të fakulteteve përkatëse, drejtuesve të qeverisjes vendore, konsullit italian në Shkodër etj, autoritetet përkatëse kanë përcjellë përshëndetjet e rastit.

Gjatë një prononcimi për median, rektori i Universitetit “Luigj Gurakuqi”, Prof. Dr. Artan Haxhi, krahas të tjerave, ngriti edhe problemin e infrastrukturës, ku për shkak të problemeve financiare, godina e Fakultetit të Ekonomisë, e cila sipas afatit, këtë muaj duhej të vihej në punë, ende shumë punë për të bërë në të. "Në probleminin e infrastrukturës kemi shumë për të bërë. Kemi filluar ndërtimin e një godine të Fakultetit Ekonomik, e cila për shkaqe financiare, ende nuk eshte perfunduar, por besojmë se do të vijojnë punimet në një periudhë të ardhshme", tha Haxhi.


TIRANË - Rreth 162 mijë studentë në të gjithë vendin nisin sot vitin e ri akademik. Sipas udhëzimit të Ministrisë të Arsimit dhe Sporteve, do të ulen nëpër auditorët e universiteteve publike studentët e ciklit të parë të studimeve dhe ata që do të vazhdojnë studimet master profesional e shkencor. Për programet e studimit me kohë të pjesshme dhe edukimin në distancë, viti akademik do të fillojë në datën 21 tetor 2013. Sipas udhëzimit të kësaj ministrie, periudha 24 dhjetor 2013 deri 5 janar 2014 do të jetë periudhë pushimesh për studentët. Përsa u përket studentëve që do të nisin vitin e parë të studimeve, ata duhet të bëjnë regjistrimin pranë sekretarive të fakulteteve përkatëse. Fakulteti Histori-Filologji do të shtyjë edhe një javë nisjen e vitit akademik për studimet master. Shkak i shtyrjes së afatit janë bërë fluksi i kërkesave për të vazhduar studimet në këtë fakultet. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin