01/10/2013 16:29:27

Buxheti paralizon SHBA-të: Obama i flet kombit

Me gjithë bisedimet intensive dhe një mbrëmjeje me shumë lëvizje mes Senatit me mazhorancë demokrate dhe Dhomës së Përfaqësuesve me mazhorancë republikane, nuk u miratua në kohën e duhur asnjë projektligj financiar

WASHINGTON - Shteti federal amerikan u paralizua sot në mëngjes për herë të parë pas 17 viteve, gjë që pritet të ndikojë financiarisht qindra mijëra funksionarë si pasojë e mungesës së një marrëveshjeje mbi buxhetin në Kongres.

Me gjithë bisedimet intensive dhe një mbrëmjeje me shumë lëvizje mes Senatit me mazhorancë demokrate dhe Dhomës së Përfaqësuesve me mazhorancë republikane, nuk u miratua në kohën e duhur asnjë projektligj financiar që do të lejonte nisjen e vitit buxhetor 2014, i cili filloi zyrtarisht sot në orën 00:00.

Shtëpia e Bardhë i urdhëroi pak para mesnatës agjencitë federeale të ndërprisnin pjesërisht aktivitetet për të cilat ishin parapërgatitur. Presidenti amerikan, Barack Obama tentoi të bënte një ndërhyrje të fundit dje, duke paralajmëruar se paraliza e shtetit federal do të kishte pasoja ekonomike reale dhe të menjëhershme për njerëzit e zakonshëm. "Ata e bënë vërtetë këtë", shkruajti Obama në faqen e tij në rrjetin social "Twitter" pak pas mesnatës.

Presidenti amerikan, Barack Obama pritet të mbajë një fjalim sot në orën 16:25 GMT, ditën e parë të paralizimit të shtetit federal amerikan si pasojë e mungesës së një marrëveshjeje buxhetore në Kongres, njoftoi me anë të një deklarate Shtëpia e Bardhë.

Obama do të flasë nga kopshti i Shtëpisë së Bardhë, ndërkohë që 800 000 funksionarë federalë u detyruan sot të merrnin leje të papaguar për një periudhë të papërcaktuar kohe duke shënuar kështu mbylljen e parë të pjesshme të aktiviteteve qeveritare të SHBA-së që prej vitit 1996. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin