27/09/2013 11:52:16

Vetëm 13 përqind e francezëve flasin mirë anglisht

Eurostat: Gjermania, Malta, Suedia dhe Qipro janë vendet me përqindjen më të lartë

BRUKSEL - Vetëm 13 për qind e francezëve e zotërojnë shumë mirë gjuhën angleze sipas një studimi të zyrës europiane të statistikave Eurostat të publikuar me rastin e Ditës Europiane të Gjuhëve të Huaja. Franca, së bashku me Italinë janë vendet e BE-së ku numri i të rriturve nga 25 deri në 64 vjeç që zotërojnë mirë anglishten është më i vogël.

Gjermania, Malta, Suedia dhe Qipro janë vendet me përqindjen më të lartë. Sipas studimit të zotëruarit e mirë të anglishtes sjell aftësinë për të kuptuar dhe prodhuar një gamë të gjerë tekstesh duke përdorur gjuhën me më shumë fleksibilitet.

Në 28 vendet anëtare të BE-së, 83 për qind e nxënësve të ciklit fillor studiojnë anglishten si gjuhë të huaj, ndërsa 19 për qind e tyre studiojnë frëngjisht, 9 për qind gjermanisht dhe 6 për qind spanjisht.

Gjatë shkollës së mesme 94 për qind e nxënësve studiojnë anglisht, 23 për qind frëngjisht, 21 për qind gjermanisht dhe 18 për qind spanjisht, sipas të dhënave të mbledhura nga Eurostat në vitin 2011.

Dita Europiane e Gjuhëve të Huaja feston pasurinë linguistike të Evropës që numëron rreth 225 gjuhë.

HermesNews - ©2013

Dërgo me email | Stampo artikullin