23/09/2013 10:39:11

E dashura e Gjermanisë

Berliner Morgenpost

BERLIN - Shtypi gjerman festoi sot në mëngjes fitoren e Angela Merkel, kancelares më të dashur për gjermanët pas fitores së saj të padiskutueshme në zgjedhjet legjislative të së dielës, edhe pse ajo humbi mazhorancën e saj absolute.

"E dashura e Gjermanisë", është titulli i së përditshmes "Berliner Morgenpost" shoqëruar nga një foto ku kancelarja, Angela Merkel shfaqet e qeshur pasi arriti të mblidhte 41,5 për qind të votave, sipas rezultateve zyrtare provizore.

"Partia CDU i detyrohet për suksesin e saj popullaritetit të madh personal të kancelares", thekson e përditshmja ekonomike gjermane "Handelsblatt" duke parë fitoren nën dritën e një reagimi të menjëhershëm ndaj politikave europiane të kancelares gjatë viteve të fundit.

"Strategjia e ndihmës ndaj vendeve evropiane në vështirësi pavarësisht reformave me sa duket u ka pëlqyer zgjedhësve gjermanë", citon më tej e përditshmja.

E përditshmja konservatore gjermane "Die Welt" i bën gjithashtu jehonë triumfit të Merkelit duke u shprehur se ajo fitoi edhe pa partinë e saj. "Ajo u pëlqen gjermanëve sepse punon në mënyrë diskrete dhe pa narcisizëm dhe nuk shkakton reagime nervozizmi apo zemërimi tek bashkëqytetarët e saj", shkruan "Die Welt".

Megjithatë, shtypi gjerman nuk harron se kancelares do t'i duhet të gjejë një partner koalicioni për të qeverisur dhe ndodhet përpara dy alternativave të partneritetit me partinë rivale socialdemokrate SPD që mblodhi 25,7 për qind të votave apo me të gjelbrit të cilët arritën të merrnin 8,3 për qind të votave.

"Kancelarja kërkon partner koalicioni", citon titulli i të përditshmes gjermane të qendrës së djathtë "Berliner Zeitung", ndërkohë që e përditshmja e qendrës së majtë "Süddeutsche Zeitung" shkruan "Merkeli nuk ka ç'të zgjedhë".

Pavarësisht avantazhit të saj të madh, bisedimet mbi partneritetet e mundshme nuk do të jenë të thjeshta. "Asnjë prej koalicioneve të mundshme CDU/SPD apo CDU/Të Gjelbrit nuk është alternativë e rehatshme", nënvizon e përditshmja e qendrës së majtë "Die Zeit" në faqen e saj të internetit.

"Në partinë SPD, askujt nuk do t'i pëlqente koalicioni me Merkelin sepse nuk do të ishte një aleancë mes partnerëve të barabartë dhe koalicioni mund të përfundojë si në vitin 2009 ose më keq", shkruan e përditshmja "Der Spiegel" në faqen e saj në internet duke iu referuar zgjedhjeve legjislative të katër vjetëve më parë gjatë të cilave SPD shënoi rezultatin e saj më të dobët pas qeverisjes në koalicion me kancelaren Merkel. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin