21/09/2013 15:18:54

Unioni i Gazetarëve Shqiptarë denoncon

Gjendja e gazetarëve në vend është e dëshpëruar

TIRANE- Unioni i Gazetarëve Shqiptarë denoncon gjendjen më të rëndë financiare dhe ekonomike në të cilën gjenden aktualisht mbi 90 përqind e gazetarëve të |vendit. Kjo situatë kritike është shkaktuar nga kohët e gjata të mosdhënies së pagave mujore për gjithë punonjësit e mediave prej të cilave, aktualisht në 75 përqind të tyre pagat mujore vonohen nga dy deri në gjashtë muaj. Kjo situatë ka rritur pasigurinë dhe rrënuar ndjeshëm dëshirën dhe kontributin për ushtrimin e profesionit në mënyrë të cilësishme dhe të pavarur.

Vetëm gjatë pesë muajve të fundit, në |gjykatat e faktit janë hapur 48 procese gjyqësore për kundërshtim të largimeve të padrejta nga puna dhe mosrespektim të kontratave dhe legjislacionit shqiptar, nga ana e punëdhënësve. Vetëm gjatë tre muajve të fundit nga media me një histori suksesi, janë pushuar maisivisht dhe larguar nga puna mbi 300 punonjës prej të cilëve, 130 gazetarë.

Unioni i Gazetarëve Shqiptarë konstaton i alarmuar se kriza ekonomiko-financiare do ta bëjë edhe më të rëndë e më të shtrirë dramën sociale për komunitetin e gazetarëve. Janë qindra reporterë në të gjitha qytetet e vendit që vazhdojnë të punojnë dhe raportojnë në kushte dhe rrethana sakrifikuese, por që presin në raskapitje marrjen e pagave të vonuara deri dhe në një vit. Ndërkohë që qindra të tjerë në gjithë skenën mediatike të vendit janë në ankthin e presionit dhe shkurtimeve të vendeve të punës dhe zëvendësimit nga praktikantë dhe studentë të gazetarisë, të cilët po e shembin jo vetëm hierarkinë e vlerave profesionale, por njëkohësisht banalizojnë kriteret rekrutuese në media dhe entet mediatike të vendit.

Unioni I Gazetarëve Shqiptarë denoncon skandalin e zbuluar nga disa anëtarë të Unionit të Gazetarëve për mungesën e derdhjeve të kontributeve financiare mujore për gazetarët e punësuar në disa media. Përfaqësues të Unionit të Gazetarëve po investigojnë këtë skandal të fshehur sipas të cilit, edhe pse nga administratorët dhe pronarët e mediave u janë mbajtur përqindjet e kontributeve, ato rezultojnë të paderdhura në thesarin e Institutit të Sigurimeve Shëndetësore.

Sipas të dhënave që disponon Unioni i Gazetarëve janë me dhjetra dhe qindra gazetarë që kanë muaj e vite për të cilët nuk janë derdhur kontribute financiare. Zbulimi këtij skandali rikthen historinë e dhimbshme të pasigurisë financiare dhe të punës në të zezë të gazetarëve shqiptarë dhe rikonfirmon historinë e pambyllur të pamundësisë së përfitimit prej shumicës së tyre, të pensionit në vitet e ardhëshme.

Unioni i Gazetarëve Shqiptarë fton të gjithë gazetarët të bëhen bashkëformulues të Memorandumit në të cilin do të shtrohen kërkesat dhe strategjia për përballimin e gjendjes së rëndë financiare dhe sociale të gazetarëve. Ky Memorandum do të jetë dokumenti bazë që do të kërkohet të negociohet fuqimisht me autoritetet e larta dhe vecanërisht partnerët tanë social si dhe me ligjzbatuesit institucionalë në vend. Unioni i Gazetarëve Shqiptar paralajmëron përshkallëzimin e reagimeve deri në protesta dhe greva.

Unioni i Gazetarëve Shqiptarë

Dërgo me email | Stampo artikullin