19/09/2013 12:56:52

Vritet muzikanti ekstremist i majtë Pavlos Fisas

Asnjë studio ligjore nuk merr në mbrojtje vrasësin

ATHINË - Greqia është ende e tronditur pas vdekjes së të riut, Pavlos Fisas, një këngëtar i muzikës rep dhe militant i grupit radikal të majtë Antarsia, i cili u vra të martën në mbrëmje pas një grindjeje për motive politike nga një anëtar i Agimit të Artë.

Një tregues i qartë i tensionit që mbretëron në vend është fakti se asnjë studio ligjore e zonës së Pireut ku ndodhi vrasja, nuk pranon të marrë nën mbrojtje vrasësin. Si pasojë e kësaj, Prokuroria e Përgjithshme greke u detyrua t'i drejtohej një studioje ligjore në Athinë, e cila kërkoi të ruhej anonimati i saj.

Mbrëmë, nën masa të rrepta sigurie vrasësi i të riut, Jorgos Rupaqas, u shoqërua së bashku me bashkëshorten, kushërirën e saj dhe sekretarin e Agimit të Artë për zonën për t'u përgjigjur para gjykatësit hetues të çështjes ndaj akuzave të vrasjes dhe shkeljes së ligjit për armëmbajtjen.

Sot pritet të zhvillohet në varrezën e re të Pireut funerali i të riut, ndërkohë që të gjitha sindikatat si dhe punonjësit e sektorit të lundrimit do të zhvillojnë më 18:30 një manifestim antifashist në sheshin Davaqi në Nikea, pranë vendit ku u vra Pavlos Fisas. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin