18/09/2013 16:56:37

Tiranë, lirohet gjykatësi nga akuzat

Bien akuzat ''shpërdorim detyre'' për gjykatësin Neritan Tabaku

TIRANË - Gjykata e Shkallës së parë të Tiranës shpalli të pafajshëm ish- gjyqtarin Neritan Tabaku për akuzën e "shpërdorimit të detyrës", duke rrëzuar kështu kërkesën e Prokurorisë, që akuzoi Xhaken për shpërdorim detyre dhe kërkoi dënimin e tij me 3 vjet burg dhe të mos ushtronte profesionin e gjyqtarit për 5 vite rresht.

Neritan Tabaku u akuzua se kishte shkelur me dashje ligjin, duke mos zbardhur për 1 vit e 7 muaj vendimin e pafajësisë dhënë ndaj të pandehurit Ilir Xhakja, duke bërë që Prokuroria të mos e apelonte dot vendimin që çoi më pas në lirimin e këtij të fundit, i cili më 13 shtator 2012 ekzekutoi kryekomisarin Adem Tahiraj.

Avokati i Tabakut, Fatmir Brakja, në fjalën e mbrojtjes tha se, "dënimet e kërkuara nga Prokuroria janë të pabazuara. Akuza për shpërdorim detyre nuk ekziston, klienti im nuk ka bërë shkelje administrative dhe asnjë vepër penale, asnjë gjyqtar s’është dënuar për moszbardhje të vendimeve gjyqësore”.

Gjyqtari Bujar Krasniqi, në vendimin e trupës gjykuese vlerësoi se, "Tabaku është i pafajshëm pasi nuk u provua vepra penale", prandaj gjykata rrëzoi kërkesën e Prokurorisë, duke shpallur të pafajshëm Neritan Tabakun.Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin