11/09/2013 14:56:52

Kontroll mbi borxhin publik

Programi i qeverisë: borxh publik në parametra të përshtatshëm për nxitjen e ritmeve pozitive të rritjes, për strukturën ekonomike të vendit, si dhe për t’i lënë hapësira të mjaftueshme financimi sektorit privat

TIRANE - Qeveria e re në programin e publikuar për vitet 2013-2017, parashikon uljen graduale të borxhit publik. "Ne jemi të vendosur që gradualisht të fillojmë ta ulim borxhin publik, ta sjellim atë në parametra të kontrollueshëm dhe të mos ia lëmë barrë brezave të ardhshëm. Objektivat tona kryesore janë: ulje graduale e borxhit nëpërmjet kontrollit të defiçitit fiskal dhe përshtatjes me rritjen ekonomike (vendosja e një rregulli fiskal transparent e të besueshëm)", shkruhet në program. Në periudhën afatmesme synohet një borxh publik në parametra të përshtatshëm për nxitjen e ritmeve pozitive të rritjes, për strukturën ekonomike të vendit, si dhe për t’i lënë hapësira të mjaftueshme financimi sektorit privat. Fillimi i uljes së borxhit publik në pjesën e dytë të mandatit parashikohet që të realizohet nga një qeverisje e përgjegjshme e kontrollit mbi defiçitin buxhetor. Në një periudhë relativisht të shpejtë, borxhi publik do të plotësohet dhe me pjesën "e fshehur" të tij. Në bashkëpunim me institucione të njohura financiare parashikohet transparencë e plotë e të gjithë detyrimeve të bartura dhe të pakontabilizuara në borxhin publik të deritanishëm. Na ndiqni dhe në Facebook dhe Twitter

Komunikatë për Shtyp

Dërgo me email | Stampo artikullin