11/09/2013 12:12:25

Një milion të papunë ''në duar'' të Qeverisë

Skema e re ekonomike në programin e Qeverisë: sistemi i ngjashëm me atë gjerman

TIRANË - Ndryshimi i strukturës së ekonomisë, nga një ekonomi e bazuar tek konsumi i mallrave të importuara, emigracioni e informaliteti në një ekonomi që bazohet tek puna dhe rritja e produktivitetit, është çelesi i suksesit për punësimin e rreth një milion shqiptarëve, publikon në programin qeverisës Partia Socialiste.

Qeveria ka premtuar se do të krijoj 300 mijë vende të reja pune prej tyre 40 mijë vende të reja pune në industrinë prodhuese dhe 12 mijë vende pune shoqëruese të lidhura me to, 15 mijë në industritë e lidhura me detin, 155 mijë në aktivitetet e lidhura me bujqësinë e blegtorinë, 62 mijë përmes reformimit të programit të ndihmës ekonomike, 11 mijë vende pune në industrinë e turizmit dhe 4 mijë vende të reja pune në teknologjinë e informacionit.

Për realizmin e këtij angazhimi nevojitet dhe një riorientim tërësor i arsimit profesional drejt nevojave reale të tregut dhe kthim i shtetit në financuesin e mbështetësin kryesor të aftësimit profesional.

Sistemi mbi të cilin kjo reformë do të bazohet është sistemi dual gjerman që karakterizohet nga një ndërthurje e mësimit teorik me punë praktike.

Kurset dhe arsimi profesional do të zgjerohen edhe në zonat rurale për t’i dhenë nxitjen e nevojshme industrisë agropërpunuese. Do të trajnohen me përparësi të gjithë punëkërkuesit e regjistruar nën moshën 25-vjeçare. Po ashtu edhe të gjitha grave dhe vajzave të regjistruara si punëkërkuese do t’u ofrohet trajnim brenda një viti dhe brenda dy-vjeçarit të parë të të gjithë punëkërkuesve të regjistruar. Në bashkëpunim me sektorin privat në partneritete publike-private do të krijojmë shkollat e larta të arsimit profesional” thuhet në programin qeversisës 2013-2017.

Një tjetër angazhim është dhe ndërtimi i Agjencisë Kombëtare të Punësimit, si një njësi me buxhet dhe administrim autonom, e cila do të do mbledhë në një dhe do të rikonceptojë sipas praktikave më të mira modernizimin e zyrave të punës, sistemin e sigurimeve të punësimit, programin e nxitjes së punësimit dhe trajnimet profesionale.

Do të rinisë dialogu i munguar prej kohësh me sindikatat për të rikthyer kulturën tripalëshe mes shtetit, punëdhënësve e punëmarrësve, çka do të rijetësojë edhe Këshillin Kombëtar të Punës si një instrument themelor në hartimin e politikave të punësimit, pagave e përfitimeve sociale.

"Angazhohemi të përgjysmojmë papunësinë e regjistruar femërore dhe të rritim aksesin e Personave me Aftësi të Kufizuar në punësim, përmes programeve dhe kurseve kualifikuese të përshtatura për personat me aftësi të kufizuara", thuhet në programin qeverisës përsa i përket punësimit. Na ndiqni dhe në Facebook dhe Twitter

Komunikatë për Shtyp

Dërgo me email | Stampo artikullin