10/09/2013 19:22:48

Shqiptarët më pak depresivë se vendet e tjera

Shqipëria bën pjesë në grupin e vendeve me një përqindje të ulët vetëvrasjesh

TIRANË - Vetëvrasjet përbëjnë një fenomen në rritje kudo në botë, ashtu dhe në vendin tonë, ndërkohë që mund të parandalohen. Krahasuar me vendet e tjera në botë, sipas Organizatës Botërore të Shëndetësisë, Shqipëria bën pjesë në grupin e vendeve me një përqindje të ulët vetëvrasjesh, më pak se 6,5 vetëvrasje për 100 000 banorë.

Por, pavarësisht kësaj, numri i vetëvrasjeve në vend ka ardhur duke u rritur. “Është e nevojshme një rritje e ndërgjegjësimit se vetëvrasja përbën një ndër shkaktarët kryesorë, por njëkohësisht edhe të parandalueshëm, të vdekjes së parakohëshme”, thonë specialistët e shëndetit publik.

Sipas OBSH, ky fenomen është rritur me 60% në mbarë botën gjatë 45 viteve të fundit. Rreth 3000 njerëz kryejnë vetëvrasje brenda një dite në mbarë botën dhe për çdo vetëvrasje të kryer, rreth 20 të tjerë mund të tentojnë t’i japin fund jetës. Po sipas OBSH, çdo vit, rreth 1 milion njerëz vdesin nga vetëvrasja.

Vetëvrasja është ndër 3 shkaqet kryesore të vdekjes për grupmoshën 15-44 vjeç në disa vende dhe shkaku i dytë i vdekjeve për grupmoshën 10-24 vjeç.

Vetëvrasja është fenomen kompleks që rezulton si pasojë e një ndërthurjeje të një sërë faktorësh, qofshin ata psikologjikë, social, biologjikë, kulturorë dhe mjedisor. Në Europë, çrregullimet mendore (veçanërisht depresioni dhe çrregullimi i përdorimit të alkoolit) përbëjnë një faktor riskues madhor për vetëvrasjen. Për këtë arsye, identifikimi dhe trajtimi në kohë i problemeve të shëndetit mendor ka një ndikim tepër pozitiv edhe në parandalimin e vetëvrasjeve.

Specialistët këshillojnë që të kontaktohet mjeku i familjes, apo specialistë të tjerë të shëndetësisë si psikologu, apo psikiatri, për probleme të shëndetit mendor. Data 10 shtator është përcaktuar si Dita Botërore e Parandalimit të Vetëvrasjeve. Qëllimi i kësaj dite është rritja e ndërgjegjësimit në mbarë botën se vetëvrasja mund të parandalohet. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin