07/09/2013 17:05:51

Korriku pati rënie të kredisë

Në muajin Korrik huaja për ekonominë ra me ritmet më të shpejta përgjatë dekadës dhe kredia për ekonominë zbriti me 9.4 miliardë lekë, me një rënie prej 1.7% ndaj qershorit

TIRANE - I vetmi sektor që është kredituar nga bankat rezulton sektori i energjisë, pasi sipas Bankës së Shqipërisë, rezulton me një rritje minimale të stokut të huasë, kryesisht si rrjedhojë e huave me garanci shtetërore për energjinë për "Prodhim, shpërndarje e energjisë elektrike, gaz dhe uji".

Në muajin Korrik huaja për ekonominë ra me ritmet më të shpejta përgjatë dekadës dhe kredia për ekonominë zbriti me 9.4 miliardë lekë, me një rënie prej 1.7% ndaj qershorit.

Gati asnjë sektor nuk mundi të rrisë stokun e huasë në Korrik dhe sipas të dhënave të Bankës së Shqipërisë, bankat e nivelit të dytë janë përqendruar në mbledhjen e kredive të dhëna dhe shumë më pak për financimin e ekonomisë vendase.

Tregtia shënon dhe tkurrjen më të lartë të stokut të huasë, duke zbritur në 4 miliardë lekë me bazë mujore në korrik, nga 8.8 miliardë lekë që ishte rënia e kredisë për të gjithë biznesin. Tregtia është sektori që zë peshën më të madhe të portofolit të bankave me 34% të totalit.

Në sektorin e ndërtimit huaja bankare zbriti me 3.9 miliardë lekë, pasi vlerësohet si një nga sektorët me rrezik më të lartë nga bankat prej vitesh, pasi përballet me rënien e fuqisë blerëse. Stoku i kredisë për ndërtim përbënte 14% të totalit në korrik, nga 20% që ishte kjo peshë në janar 2010.

Po ashtu, sektori i industrisë përpunuese, që konsiderohet potencial për zhvillim, rezulton me rënie të investimeve, pasi stoku i kredisë për të u reduktua me 1.3 miliardë lekë në korrik nga muaji i mëparshëm. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin