04/09/2013 11:45:11

Shuhen shpresat për klandestinët: ndërpriten kërkimet

Nga mëngjesi i sotëm kërkimet vazhdojnë nga anijet e patrullimit të Guardia Costiera dhe të Guardia di Finanza në bregdetin Italian

OTRANTO - Kërkimet për gomonen me 27 klandestinë në bord, e cila kërkoi ndihmë 38 orë më parë, janë ndërprerë në të dy anët e Adriatikut, ndërsa vazhdon patrullimi normal i anijeve në brigjet përkatëse.

Nga mëngjesi i sotëm kërkimet vazhdojnë nga anijet e patrullimit të Guardia Costiera dhe të Guardia di Finanza në bregdetin Italian që nga gadishulli Gargano në veri deri në Santa Maria di Leuca në jug.

Sipas të njejtave burime, sot paradite dy motovedeta të tipit V-2000 italiane janë nisur përkatësisht nga Durrësi dhe Vlora në përpjekje për të vëzhguar të gjithë vijën bregdetare mes dy qyteteve.

Mbrëmjen e së hënës një telefonatë në sallën operative të Qendrës ndëroperacionale kërkoi ndihmë për rrezikun që i kanosej një gomoneje me 27 klandestinë kurdë.

Në kërkime u përfshinë anije të Rojes sonë bregdetare, motodeta të Guardia di Finanza, helikopterë shqiptarë dhe britanikë, ndërsa në bregun Italian në kërkime u përfshi edhe një aeroplan i Guardia Costiera. Kërkimet intensive janë ndërprerë, ndërsa vazhdojnë patrullimet e zakonshme në pjesën e bregdetit italian. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin