28/08/2013 16:12:58

BM, asnjë ndërhyrje pa rezolutë

''Sekretari i Përgjithshëm i OKB-së duhet t'i drejtohet Këshillit të Sigurimit menjëherë pas përfundimit të hetimit nga ekipi'', citon komunikata e qeverisë britanike

(21:19) Qeveria britanike nuk do të ndërmarrë asnjë veprim ushtarak në Siri pa shqyrtimin paraprak të rezultateve të hetimeve të ekspertëve të OKB-së mbi sulmin e mundshëm kimik, sipas mocionit që pritet të dorëzohet nesër në parlament. "Sekretari i Përgjithshëm i OKB-së duhet t'i drejtohet Këshillit të Sigurimit menjëherë pas përfundimit të hetimit nga ekipi", citon komunikata e qeverisë britanike. "Këshillit të Sigurimit në OKB duhet t'i jepet mundësia të shqyrtojë rezultatet, dhe duhet bërë çmos për marrjen e një miratimi për një ndërhyrje të mundshme ushtarake, përpara se një veprim i tillë të ndodhë", citon më tej komunikata.


(20:27) Ushtria turke ka përfocuar nivelin e saj të vigjilencës përballë çdo incidenti të mundshëm me Sirinë, ndërkohë që Turqia mbështet plotësisht alternativën e një ndërhyrjeje ushtarake ndaj regjimit sirian, deklaroi sot shefi i diplomacisë turke, Ahmet Davutoglu. "Që prej ngjarjes së sulmit kimik, ne ndodhemi në gatishmëri dhe kemi rritur nivelin e vigjilencës", deklaroi ministri turk i Punëve të Jashtme, Davutoglu për shtypin. Për sa i përket natyrës së mundshme të një ndërhyrjeje ndaj regjimit të presidentit, Bashar al-Assad dhe rolit të angazhimit turk në të, Davutoglu u shpreh se të gjitha opsionet ishin marrë parasysh. "Në situata të tilla kritike, të gjitha alternativat, opsionet, dimensionet dhe skenarët duhet të merren parasysh", theksoi ai.


(20:26) Shefi i diplomacisë britanike, William Hague theksoi sot se kishte pak gjasa të miratohej projektrezoluta e paraqitur nga vendi i tij nga Këshilli i Sigurimit, duke përsëritur se duhej gjithsesi të veprohej edhe pa miratimin e OKB-së ndaj krimit kundër njerëzimit në Siri.

"Jam në pritje të diskutimeve gjatë ditëve të ardhshme në New York, të cilat ne i kemi filluar me anë të paraqitjes së projektrezolutës sonë, sepse do të ishte mirë që Organizata e Kombeve të Bashkuara të jetë vërtetë e bashkuar, edhe pse kjo duket e pamundur si pasoj e një vetoje të mundshme nga Rusia dhe Kina. Por gjithsesi, ne duhet të përpiqemi", deklaroi Hague.

"E kemi të qartë faktin se ndoshta nuk mund të arrihet një marrëveshje dhe megjithëse OKB-ja nuk e miraton projektrezolutën, ne do të mbajmë përgjegjësi në të ardhmen edhe para kombeve të tjera", theksoi William Hague.

"Është përdorimi për herë të parë i armëve kimike në një luftë të shekullit XXI, kjo duhet të konsiderohet e papranueshme. Duhet t'i bëjmë ballë çdo krimi lufte, çdo krimi ndaj njerëzimit", nënvizoi ai. "Nëse nuk e bëjmë këtë, do të përballemi me krime edhe më të rënda në të ardhmen. Ne vazhdojmë të jemi në pritje të një përgjigjeje të fortë nga komuniteti ndërkombëtar, të ligjshme, të matur dhe të destinuar për parandalimin e përdorimit të armëve kimike në të ardhmen", shtoi ai.


(20:23) - I dërguari sirian në OKB deklaroi se ''terroristët në Siri kanë marrë materiale për të prodhuar armë kimike dhe furnitorët e tyre janë kryesisht Katari, Arabia Saudite dhe Turqia'', njoftoi ai drejtpërdrejt në rrjetin informativ arab ''Al Jazeera''. Sipas ambasadorit të Damaskut në Organizatën e Kombeve të Bashkuara ''ishte Izraeli ai që po nxiste Shtetet e Bashkuara të Amerikës drejt një agresioni ushtarak'' kundër Damaskut.


(20:22) Kancelarja gjermane, Angela Merkel, edhe pas konfirmimit të kryerjes së një sulmi të mundshëm me armë kimike në afërsi të Damaskut, vazhdon të theksojë se ''për Sirinë vetëm një zgjidhje politike mund të ishte fundi i kësaj krize dhe gjakderdhjeve. Lufta civile që po zhvillohet aktualisht në vend mund të ndalohet vetëm përmes një zgjidhjeje politike që do të sillte rikthimin e qetësisë dhe stabilitetit'', u shpreh ajo për të përditshmen gjermane, ''Mittelbayerische Zeitung''.


(20:21) Përfaqësuesi i Sirisë në Organizatën e Kombeve të Bashkuara, Bashar Jafa'ari, gjatë një konfrence për shtyp në Pallatin e Xhamtë, që u transmetua drejtpërdrejt nga rrjeti informativ arab Al-Jazeera, u shpreh se ''vendi i tij ishte aktualisht në gjendje lufte. Jemi në gjendje lufte", theksoi ai në përgjigje të një pyetjeje, ku theksoi se ''vendi i tij do të ndërmerrte të gjitha masat paraprake të mundshme për t'u vetëmbrojtur''.


(20:20) SHBA u shpreh sot se projektrezoluta britanike për një ndërhyrje të mundshme në Siri, që po diskutohet aktualisht në Këshillin e Sigurimit në OKB-së ka të ngjarë të mos miratohet. "Ne nuk shohim sukses të mundshëm të votimit në fjalë, duke marrë parasysh kundërshtimet e vazhdueshme të Rusisë", deklaroi zëdhënëja e diplomacisë amerikane, Marie Harf.


GJENEVË - I dërguari i posaçëm i OKB-së dhe i Lidhjes Arabe, Lakhdar Brahimi shprehu sot keqardhjen pas përdorimit të një "substance" gjatë sulmit të 21 gushtit, në Siri, që shkaktoi qindra të vdekur. "Me sa duket një lloj substance është përdorur duke vrarë shumë persona, pa asnjë dyshim mbi 100, disa flasin për 300, disa për 600, ndoshta 1 000 edhe më tepër", deklaroi Brahimi, gjatë një konference shtypi në Gjenevë.

HermesNews - ©2013

Dërgo me email | Stampo artikullin