27/08/2013 20:15:50

Shirat: inertet mbulojnë rrugët në Durrës

Një pjesë e rrugëve pranë zonës kodrinore të qytetit janë mbushur me inertet që kanë sjellë përrenjtë e krijuar nga ujrat e reshjeve të shiut

DURRËS - Në orët e para të mbrëmjes është normalizuar plotësisht situata e krijuar nga përmbytjet që përfshinë sot disa lagje të qytetit të Durrësit. Kryqëzimet në hyrje të qytetit, në shëtitoren “Taulantia”, si dhe në lagjet periferike të Plazhit, Spitallës dhe Shkozetit janë rikthyer në gjendjen e tyre normale, disa orë pasi u ndalën reshjet e shiut. Një pjesë e rrugëve pranë zonës kodrinore të qytetit janë mbushur me inertet që kanë sjellë përrenjtë e krijuar nga ujrat e reshjeve të shiut, ndërsa në pjesën turistike të qytetit është shtuar prania e baltës, pasojë e rrëshqitjeve nga zona kodrinore në lagjen Nr.1 të qytetit. Reshjet e para të këtij sezoni krijuan pështjellimin e trafikut për afro dy orë.

HermesNews - ©2013

Dërgo me email | Stampo artikullin