26/08/2013 15:58:30

Perëndimi nuk ka prova për Assad: Lavrov, po shkelin të drejtat

Perëndimorët janë të paaftë të provojnë pretendimet e tyre mbi sulmin kimik të presupozuar të jetë ndërmarrë nga regjimi sirian, deklaroi sot shefi i diplomacisë ruse, Sergei Lavrov

(16:03) Shefi i diplomacisë britanike, William Hague u shpreh sot se ishte i mundur reagimi ndaj përdorimit të armëve kimike në Siri pa unanimitetin e plotë të Këshillit të Sigurimit të OKB-së por refuzoi të spekullonte mbi mënyrën e reagimit nga vendet perëndimore.

(16:02) Qeveria siriane u ka dhënë sot miratimin inspektorëve të OKB-së të hetojnë "menjëherë" përdorimin e dyshuar të armëve kimike pranë Damaskut, bënë të ditur burime zyrtare nga Ministria e Jashtme siriane.

(16:01) Moska nuk do të hyjë në luftë me asnjë vend, kjo dhe në rast ndërhyrjeje ushtarake të perëndimorëve në Siri, deklaroi pak më parë ministri rus i Punëve të Jashtme, Sergei Lavrov, në përfundim të një konference për mediat në Moskë, gjatë të cilës u shpreh se ''nuk dëshironte t'u përgjigjej pyetjeve që fillonin me ''Nëse''. ''Moska nuk do të hyjë në luftë me asnjë shtet edhe në rast ndërhyrjeje ushtarake të vendeve perëndimore në Siri'', theksoi kryediplomati rus në përfundim të konferencës së shtypit në Moskë.


MOSKË - Deklaratat e perëndimorëve mbi Sirinë bien në kundërshtim me marrëveshjet e samitit të fundit të ''G 8'', sipas të cilave çdo episod që lidhet me përdorimin e armëve kimike duhet të hetohet deri në hollësitë më të vogla dhe rezultatet duhet të dorëzohen në Këshillin e Sigurimit në Organizatën e Kombeve të Bashkuara dhe më pas të flitet për sulme, u shpreh sot gjatë një konference shtypi në Moskë, Ministri i jashtëm rus, Sergei Lavrov.

Sipas Lavrov ''Perëndimi po merrte dy role, të hetuesit dhe atë të Këshillit të Sigurimi. Ata nuk mund të japin prova mbi sulmet por thonë se linja e kuqe është shkelur dhe nuk mund të pritet më", deklaroi Lavrov gjatë një konference shtypi.

HermesNews - ©2013

Dërgo me email | Stampo artikullin