21/08/2013 13:36:29

CEZ lë Fierin në errësirë: nuk paguan dritat

Sipas drejtorit të ndërmarjes, Edmond Leka, shkaku qëndron te borxhi që bashkia Fier i ka kompanisë së shpërndarjes së energjisë, Fier

FIER - Pjesa më e madhe e qytetit te Fierit eshte ne errësirë jo për shkak të kufizimit të energjisë apo ndonjë defekti, por për shkak të borxhit që i detyrohet ndërmarrja komunale CEZ-it.

Bulevardi kryesor i qytetit, rruga “Skënderbeu”, rrugët e lagjes "29 Nëntori" deri te kryqëzimi i Daullasit dhe akse të tjera rrugore, janë përfshirë natën e mbrëmshme nga mungesa totale e energjisë elektrike. Ndricim pjesor kanë pasur disa nga akset e tjera të qytetit.

Sipas drejtorit të ndërmarjes, Edmond Leka, shkaku qëndron te borxhi që bashkia Fier i ka kompanisë së shpërndarjes së energjisë, Fier. Sipas tij, edhe pse ndërmarja ditën e premte ka derdhur në llogarinë e CEZ 5 milionë lekë duke e cuar në këtë mënyrë shumën e reduktimit të borxhit në 11 milionë lekë, sërisht dritat janë ndërprerë, duke shkaktuar anormalitet dhe probleme në jetën e qytetit.

Leka pohon se i ka kërkuar CEZ një afat kohor për shlyerjen e detyrimeve të prapambetura, ndërkohë që këta të fundit shprehen se e kanë mirëpritur ofertën e përfaqesuesve të bashkisë për likujdimin e borxhit.

Nga ana tjetër, CEZ ka paralajmëruar të gjithë debitorët se do të përballen me ndërprerjen e energjisë. Borxhi që i detyrohen abonentët, biznesi dhe institucionet kompanisë së shpërndarjes së energjisë ne Fier shkon në rreth 5 milionë dollare.

HermesNews - ©2013

Dërgo me email | Stampo artikullin