19/08/2013 16:10:39

Kisha në Përmet: qytetarët kundër Bashkisë

Gjykata Kushtetuese në vitin 2002 ka vendosur në favor të pushtetit vendor, por prej 11 vitesh ky objekt u mbajt forcërisht nga Kisha Ortodokse

PËRMET - Një grup besimtarësh ortodokës hynë të Hënën forcërisht në Pallatin e Kulturës së Përmetit, i kthyer në një objekt konflikti mes kishës dhe pushtetit vendor, pas vendimit të Gjykatës Kushtetuese për t'ia kthyer këtë godinë Bashkisë.

Godina dykatëshe, dikur krenaria e përmetarëve, ka heshtur së funksionuari në vitin 1997. Pallati i Kulturës u ndërtua 51 vjet më parë, në vitin 1962. Pas Luftës së II-të Botërore, në truallin ky është ngritur Pallati i Kulturës dhe lulishtja e qytetit, jetonin në baraka 30 familje.

Në vitin 1958 u shpërngulën, pasi sistemi komunist hartoi një plan rregullues. Në nëntor të vitit 1962 u inaugurua lulishtja e qytetit së bashku me Pallatin e Kulturës. Gjykata Kushtetuese në vitin 2002 ka vendosur në favor të pushtetit vendor, por prej 11 vitesh ky objekt u mbajt forcërisht nga Kisha Ortodokse.

Pallati i Kulturës funksionoi si objekt fetar prej 26 majit 1997, falë një vendimi të Komisionit të Pronave të rrethit të Përmetit. Me sipërfaqe rreth 6000 metra katror, Pallati i Kulturës figuron me nr. pasurie 16/9, ndërsa Zyra e Përmbarimit ka tentuar 15 herë të ekzekutojë vendimin e Gjykatës Kushtetuese, por fatkeqësisht janë penguar nga përfaqësuesit e Kishës.

HermesNews - ©2013

Dërgo me email | Stampo artikullin