19/08/2013 08:39:47

Italia frenon investimet dhe bizneset në vend. Shkak, burokracia

Raporti: sipas Bankës Botërore Italia mund të renditet shumë pas vendeve aziatike dhe afrikane që vitet e fundit kanë ndërrmarrë shumë reforma për rritjen

ROME - Italia është në vendin e 87-të në botë për mundësitë që jep për të bërë biznes, por mund të rrëshqasë dhe në vend të 100-të deri në fund të vitit 2013-të.

Lajmi u dha nga ekspertët e Bankës Botërore që në vitin e kaluar kishin parë një zbritje të Italisë nga vendi i 83-të ku ishte. Praktikisht Italia është pas Mongolisë, Bahamas, Zambisë, Bruneit e Shqipërisë. Sipas Bankës Botërore Italia mund të renditet shumë pas vendeve aziatike dhe afrikane që vitet e fundit kanë ndërrmarrë shumë reforma për rritjen.

Britania e Madhe është në vendin e 7-të, Gjermania në vendin e 19-të, Franca në 29-tin për të mos folur për vende të tjera të G7-tës si SHBA, Kanada, Japonia, që ndodhen në vendin e 7-të, 12-të dhe 20-të.

Shkak për këtë rëshqitje të vendit sipas Konfindustria-s janë burokracitë e panumërta dhe funksionimi i keq i aparatit publik. Për kompanitë burokracia shihet si një shkak kryesor i pamundësisë për të zhvilluar aktivitet në Itali.

Mjafton të shohësh kontratat e punës dhe normativat që rregullojnë punëmarrësit dhe punëdhënësit e nuk është e vështirë të kuptosh sa e komplikuar është të punosh.

Një prezencë e fortë e sindikatave në çdo qoshe të aktiviteteve pengon nga ana tjetër fleksibilitetin në punë.

HermesNews - ©2013

Dërgo me email | Stampo artikullin