16/08/2013 12:27:56

Tkurret kredia ne valute

Totali i kredisë në valutë të huaj në fund të muajit Qershor ishte afro 342 miliardë lekë

TIRANË - Kredia në valutë është tkurrur më tej gjatë gjysmës së parë të vitit 2013-të. Sipas të dhënave nga Banka e Shqipërisë, totali i kredisë në valutë të huaj në fund të muajit Qershor ishte afro 342 miliardë lekë, me një rënie prej 3,4% krahasuar me një vit më parë.

Kredia në valutë ka zbritur në 61% të totalit, nga 64% që zinte vitin e kaluar. Banka e Shqipërisë prej vitesh insiston që kredia të merret në monedhën e të ardhurave. Për këtë arsye, bankave u janë vendosur masa rregullatore kufizuese, përmes të cilave ju kërkohet më shumë kapital për mbulimin e kredive që janë të ekspozuara ndaj rrezikut të kursit të këmbimit.

Një faktor tjetër që ka kufizuar kreditimin në valutë është dhe vështirësia në rritje për sigurimin e fondeve në valutë. Siç dihet, sistemi bankar shqiptar zotëron pjesën më të madhe të depozitave në lekë, ndërsa mbi 60% e kredisë është në valutë të huaj.

Për arsyet e mësipërme, kreditimi në euro i vendos herë pas here bankave në nevojën e kufizimit të kreditimit në valutë, për të ruajtur parametrat e detyrueshëm rregullatorë të kapitalizimit dhe likuiditetit. Ndërkohë që një nga shkaqet që uljet e normës bazë për lekun kanë një efekt të dobët është mbizotërimi i kredisë në valutë.

HermesNews - ©2013

Dërgo me email | Stampo artikullin