07/08/2013 18:53:08

Gjibraltari: Spanja akuzon Britaninë për rritje kontrolli

Kryeministri Rajoy u telefonua sot në mëngjes nga homologu i tij britanik, David Cameron

MADRID - Kryeministri i Spanjës, Mariano Rajoy tha sot se qëndrimi i autoriteteve të Gjibraltarit për dhënien fund të hyrjeve të paautorizuara të peshkatarëve spanjollë në territorin e tij, është i papranueshëm, gjatë një bisede telefonike me homologun e tij britanik, David Cameron.

"Vendimi njëpalësh për vendosjen e blloqeve të betonit në gjirin e Algeciras është i papranueshëm", deklaroi Mariano Rajoy përmes një komunikate, ndërkohë që tensioni mbi territorin britanik të pretenduar nga Spanja është në rritje që prej fundit të Korrikut.

Sipas një komunikate të qeverisë spanjolle, kryeministri Rajoy u telefonua sot në mëngjes nga homologu i tij britanik, David Cameron, telefonatë gjatë së cilës u diskutua mbi çështjen në fjalë dhe që zgjati dhjetë minuta.

"Marrëdhëniet dypalëshe mes Spanjës dhe Britanisë së Madhe janë marrëdhënie mes partnerësh, miqsh dhe aleatësh, që nënkupton se konfliktet e lindura mes dy palëve duhet të trajtohen me ndershmëri dhe transparencë, me anë të një dialogu që respekton ligjin ndërkombëtar, europian dhe kombëtar", citon më tej komunikata.

Tensioni mes autoriteteve spanjolle dhe atyre të Gjibraltarit u rrit pas vendimit për vendosjen e blloqeve të betonit, duke u dhënë fund hyrjeve të paautorizuara të peshkatarëve spanjollë.

Më pas u vunë barriera në kufi me Gjibraltarin, kjo bëri që Spanja të akuzojë menjëherë për rritjen e kontrollit ndaj tij. Madridi, që i shprehu shqetësimin Londrës mbi këtë çështje, i kërkoi Britanisë së Madhe të konsideronte një pagesë prej 50 eurosh në pikat e hyrjes dhe daljes nga Spanja.

HermesNews - ©2013

Dërgo me email | Stampo artikullin