29/07/2013 21:38:30

Shkodra jeton në dioksinë: mbeturinat digjen jashtë

Qytetaret marrin çdo dite helme të një rrezikshmërie të lartë

SHKODËR - Djegia e mbeturinave në afërsi të qytetit të Shkodrës vijon të mbetet një nga problemet më shqetësuese për komunitetin e qytetit verior, ndërsa vendepozitimi i tyre është në një vend krejt të papërshtatshëm, në breg të lumit Kir, ngjitur me Varrezat e Dëshmorëve dhe shumë afër banesave të komunitetit.

Për të mos mjaftuar kjo, grumbujve të mbeturinave, të hedhura në këtë zonë, u vihet zjarri, duke krijuar një situatë jashtë mase shqetësuese.

Aroma mbytëse dhe tejet e pa përballueshme pushton jo vetëm banorët, shtëpitë e të cilëve janë afër vendit të djegies, por era që fryn në breg të Drinit, i shpërndan ato në të gjithë qytetin.

Ndaj këtij fenomeni ka ngritur zërin jo pak herë edhe Drejtoria e Shëndetit Publik, duke dhënë alarmin se djegia e këtyre mbeturinave ka pasoja për shëndetin e banorëve, por deri tani, përveçse ndonjë aksioni spontan të forcave të rendit, nuk ka asnjë ndryshim në këtë drejtim, edhe pse ka një marrëveshje nga Bashkia dhe disa njësi vendore, me administruesit e Landfildit të Bushatit, një investim i Qeverisë shqiptare në vlerën e katër milionë eurove.

Shkaqet dhe argumentet e një mosmirëkuptimi për një gjë të tillë thuhet se janë të ndryshme, deri edhe tek çmimi për ton i depozitimit të mbeturinave, që bashkia pretendon se është më e madhe se sa duhet, por ato që vazhdojnë ta vuajnë një gjë të tillë janë qytetarët shkodranë.

HermesNews - ©2013

Dërgo me email | Stampo artikullin