29/07/2013 11:59:23

Bio shqiptare pa treg në Shqipëri

Fermerët po punojnë për të ngritur një rrjet shitjesh me prodhime Bio nga serat e tyre

TIRANE - Fermerët në gjithë vendin janë duke shtuar sipërfaqet me sera për prodhime bio, dhe po tërheqin vemendjen e klienteve vendas dhe tregtarëve të huaj. Specialistët pohojnë se cilësia e lartë e këtyre prodhimeve nuk reklamohet sa duhet, dhe ato konkurrohen fort nga prodhimet e jashtme.

Enver Isufi, ekspert i fushës së bujqësisë Bio, shprehet se fermerët po punojnë për të ngritur një rrjet shitjesh me prodhime Bio nga serat e tyre. Ushqimet e importit nuk kanë shije dhe as garanci dhe askush më mirë se perimet e tyre nuk mund të ushqejnë banorët, kërkesat e të cilëve sa vijnë e rriten për prodhimet bio.

Klientë të rregullt të këtyre tendave shitjesh krahas banorëve janë bërë edhe udhëtarët e shumtë që rrahin rrugët dhe autostradat e Durrësit, qofshin nga Tirana, nga Korca apo edhe nga Kosova. Ata ndalojnë menjëherë sapo shohin rerklamat e prodhimeve Bio.

Në këto tregje gjen gjithmonë ullinj, perime e fruta të një cilësie të lartë, të gjitha të mbrojtura nga skema bio. Specialisti Isufi, drejtor i Institutit të bujqësisë BIO, thotë se, kërkesat në rritje të klientëve vendas dhe të huaj kanë bërë që të rritet mbështetja financiare e shtetit dhe e bankave për këtë lloj bujqësie të re.

Të ndërtosh një fermë bio nuk është një punë e lehtë. Sipas traditës, vetëpunësimi familjar është baza e punës. Fatmir Kallbaqi punon me fëmijët dhe bashkëshorten, ndërsa me shitjen merret vëllai me familjen e vet. Ai thotë se kërkesat për prodhimet bio janë 10-fishuar, ndërsa marketingu i këtyre rrjeteve podhuese dhe shitëse është shumë i vogël dhe ky shihet si një problem kryesor.

Krahas tregjeve në Durrës, fermerët bio kanë ngritur shitore edhe në Shkodër, Velipojë, Vlorë e në kryeqytet. Sipas tyre, megjithë përmirësimet, mundësitë janë shumë më të mëdha për të përhapur prodhimet shqiptare bio brenda dhe jashtë vendit.

HermesNews - ©2013

Dërgo me email | Stampo artikullin