22/07/2013 13:00:44

Policia arreston babain që dhunonte nënë e bijë

Denoncimi në polici: arrestohet Gazmend Banushi

SHIJAK - Mund të kishte përfunduar në tragjedi ngjarja në Shijak, nëse bashkëshortja 40 vjeçare nuk do të kishte bërë denoncim në polici.

Uniformat blu morën në mbrojtje të dëmtuarën dhe fëmijët dhe më pas arrestuan autorin e kësaj ngjarje, duke ndërmarrë masat përkatëse të sigurisë.

Bëhet fjalë për 43 vjeçarin Gazmend Banushi, banues në Shijak. Ai u arrestua në flagrancë. Gjatë kontrollit në banesë u gjet një armë zjarri, pistoletë model 54 së bashku me krëhërin me 4 copë fisheke, një armë gjahu, teke gjysmëautomatike, disa fishekë dhe arme gjuetie.

Nënë e bijë kanë rrëfyer, dhunën dhe fyerjet, deri në tentativat për t'u larguar fshehurazi nga shtëpia. Në ndjekje të tyre, i armatosur me pistoletë është vënë bashkëshorti i cili i ka kërcënuar telefonikisht për jetën.

Babai kishte pretenduar se nuk ishin respektuar anetarët e fisit të tij.

Arrestimi i këtij shtetasi u bë për veprat penale të "Dhunës në Familje" dhe "Mbajtjes pa leje të armëve e municioneve luftarake".

Një ditë më parë, Asllan Hoxha tentoi të vriste bashkëshorten nënë e një bebeje 15 muajshe. Ai e kishte dhunuar dhe tentoi djeg’jen e banesës.

Ky shetatas u arrestua në flagrancë për veprat penale të "Shkatërrimit të pronës me zjarr, mbetur në fazën e tentativës" dhe "Shtrëngimit ose pengimit për të bashkjetuar ose për të zgjidhur martesë".

HermesNews - ©2013

Dërgo me email | Stampo artikullin