17/07/2013 20:17:00

Durrës, sekuestrohet Benzi me arsenal armësh

Gjatë kontrollit në automjetin Benz, pa targa, u gjetën 5 mitrolozë të lehtë, 4 armë automatike, tre pushkë dhe dy pistoleta, dy granathedhësa, 15 arka me fishëkë, si dhe një granatë dore

DURRËS - Policia e Durrësit sekuestroi sot një tjetër arsenal me armë dhe municione luftarake, në një automjet në oborrin e një banese në fshatin Hamallaj, 26 km në veri të qytetit bregdetar. Burime zyrtare nga Policia e qarkut bënë të ditur se automjeti ndodhej në oborrin e shtëpisë së 26-vjeçarit Hajri Qyra, i cili u shoqërua nga uniformat blu mbrëmjen e kaluar, në pyetje mbi armët e gjetura në banesën e shtetasit Afrim Hoxha, në fshatin Shkallnuer. Burimet e Policisë sqarojnë se gjatë kontrollit në automjetin Benz, pa targa, u gjetën 5 mitrolozë të lehtë, 4 armë automatike, tre pushkë dhe dy pistoleta, dy granathedhësa, 15 arka me fishëkë, si dhe një granatë dore. Armët dhe municionet e sekuestruara gjatë 24 orëve të fundit, në fshatrat Shkallnuer dhe Hamallaj kanë sjellë edhe arrestimin e dy personave të implikuar në këto ngjarje, ndërsa po punohet intensivisht për zbulimin e destinacionit të materialeve luftarake dhe lidhjen mes dy rasteve, tha Policia.

HermesNews - ©2013

Dërgo me email | Stampo artikullin