15/07/2013 10:11:32

Euro forcohet, bie dollari

Dollari amerikan ka humbur pikë këtë të hënë kundrejt lekut

TIRANE - Monedha euro gjatë kësaj jave ka pësuar një rritje të lehtë kundrejt monedhës vendase, lekut ndërsa është dobësuar në këmbim me dollarin. Në fillim të kësaj jave, monedha e përbashkët europiane u këmbye në tregun valutor vendas, sipas kursit zyrtar, mesatarisht në blerje 140 lekë, ndërkohë që, një javë më parë u këmbye me 139.6 lekë, duke fituar 0.4 pikë.

Edhe në shitje, ajo u tregtua me 140.5 lekë, duke u forcuar me 0.3 pikë në krahasim me javën e kaluar. Ndërkohë dollari amerikan ka humbur pikë këtë të hënë kundrejt lekut. Monedha e gjelbërt blihet me 107.2 lekë nga 108.5 lekë që është blerë një javë më parë, duke u dobësuar me 1.3 pikë. Ndërsa është shitur me 107.8 lekë nga 109.2 lekë që ishte një javë më parë, pra ka shënuar një ulje prej 1.4 pikësh.

Në optikën e ekpertëve, mbështetur dhe në pritshmërinë e ecurisë së tregut valutor, parashikohet një forcim i metejshëm i lekut kundrejt valutave, favorizuar kjo nga sezoni i verës dhe rritja e fluksit të euros dhe dollarit në treg.

HermesNews - ©2013

Dërgo me email | Stampo artikullin