06/07/2013 20:50:37

Moda dhe kujdesi ndaj ambjentit

Shtëpitë e modës po drejtohen gjithnjë e më shumë drejt kujdesit për ambjentin

ROME - Shtëpitë e modës po drejtohen gjithnjë e më shumë drejt kujdesit për ambjentin në mënyrë që moda të mos kushtojë aspak për natyrën. Valentino është një nga të paktat shtëpi të modës që “kalon” në klasifikimin “The fashion duel” të Greenpeace, ndërsa “ngelen” Prada, Dolce&Gabbana, Cavalli, Chanel dhe Hermes.

Valentino në vecanti është angazhuar të ndjekë politika që nuk i shkaktojnë dëme natyrës, për shembull ka ndërmarrë masa të tilla që parandalojnë shpyllëzimin për prodhimin e lëkurës etj., si dhe parandalime të ndotjes apo helmimit të ujit.

Në rrugë të mirë është edhe Gucci, që sipas specialistave në këtë fushë do të arrijë së shpejti nivelin e Valentinos. Gucci prej kohesh tashmë është angazhuar në politika të blerjes së lëkurës dhe copës që respektojnë ambjentin dhe nga viti 2009 ka mbështetur aktivisht moratorium mbi zgjerimin e bagëtisë në Amazon.

Disa muaj më parë ka lançuar çantën Hobo bag e bërë me lëkurë të kontrolluar dhe të ligjshme nga Amazona. Tani po punojnë edhe mbi substancat toksike.

Benetton është një tjetër firmë italiane e angazhuar në eliminimin e substancave toksike. Por mungojnë të mëdhenjtë e modës si Prada, Dolce&Gabbana, Cavalli, Chanel, etj. Në shtator, gjatë javës së modës, do të përditësohet lista e firmave të mëdha që bëjnë kujdes ndaj ambjentit.

Daniela Vathi

Dërgo me email | Stampo artikullin