02/07/2013 14:54:14

Grup për vlerësimin e borxhit në Eurozonë

Komisioni vendosi ngritjen e këtij grupi ekspertësh për përforcimin e disiplinës buxhetore të vendosur në pranverë

STRASBURG - Komisioni Europian shpalli të martën në Strasburg formimin e një grupi ekspertësh për vlerësimin e avantazheve dhe rreziqeve të mundshme nga një rikonstruktim i pjesshëm i borxhit në zonën euro, që shihet si hapi i parë drejt vendosjes së detyrimeve të përbashkëta.

Komisioni vendosi ngritjen e këtij grupi ekspertësh për përforcimin e disiplinës buxhetore të vendosur në pranverë, nën presionin e Parlamentit Europian.

Roli i këtij grupi do të jetë analizimi i avantazheve dhe rreziqeve që mund të sjellë vënia në dispozicion e një fondi që do të lejonte rikonstruktimin e një pjese të borxhit të zonës euro, ose emetimin e Eurobondeve, si letra me vlerë të një borxhi afatshkurtër.

Kjo temë është veçanërisht delikate për Gjermaninë, e cila merr hua me përqindje të ulët në tregun e borxhit, dhe refuzon çdo formë rikonstruktimi të borxhit të eurozonës. Tema është përsëritur disa herë, por është shtyrë për diskutim të mëvonshëm nën presionin e Berlinit.

Gjatë pikut të krizës, politikanët dhe ekonomistët evropianë nxisnin emetimin e Eurobondeve, për të ulur presionin e ushtruar ndaj vendeve më të dobëta ekonomikisht të zonës euro, normat e huamarrjes së të cilëve kishin arritur nivele tejet të larta.

"Anëtarët e grupit të ekspertëve të drejtuar nga Gertrude Tumpel-Gugerell, anëtare e vjetër e bordit drejtues të Bankës Qendrore Evropiane, kanë një ekspertizë impresionuese. Besoj se janë në gjendje të japin këshilla të çmuara nga këndvështimi politik, ekonomik dhe juridik", u shpreh presidenti i Komisionit Evropian, Hoze Manuel Barroso, Pritet që grupi i ekspertëve të raportojë konkluzionet në mars 2014.

HermesNews - ©2013

Dërgo me email | Stampo artikullin