29/06/2013 19:19:08

Gjëndja e Mandelës e qëndrueshme: policia gaz kundër protestuesve

Kreu i Shtëpisë së Bardhë pritet me protesta në Afrikë

PRETORIA - Nelson Mandela vazhdon të jetë në një "gjendje tepër kritike, por të qëndrueshme shëndetësore", deklaroi pak më parë presidenti afrikanojugor, Jacob Zuma, ku shtoi se shpresonte që paraardhësi i tij i jashtëzakonshëm, 94 vjeç, të mund të kthehej pranë familjes së tij "shumë shpejt".

"Ai vazhdon të jetë në një gjendje kritike, por të qëndrueshme ku asgjë nuk ka ndryshuar. Por, shpresojmë të përmirësohet shpejt. (...) Presim të dalë nga spitali shumë shpejt", deklaroi Zuma gjatë një konference shtypi të përbashkët me homologun e tij amerikan, Barack Obama, në Pretoria.


Në të njëjtën kohë, Presidenti amerikan, Barak Obama do të takohet sot me anëtarë të familjes së ish-presidentit afrikanojugor, Nelson Mandela, në gjendje kritike në një spital të Pretorias, në ambientet e fondacionit të tij në Johanesburg, citon një deklaratë shtypi e Shtëpisë së Bardhë.

Burime të afërta të presidentit Obama thanë se ai nuk do të vizitonte Mandelën në spital, por se do të takohej privatisht me disa anëtarë të familjes për t'i ngushëlluar në këto momente të vështira.

Obama, deklaroi se ''populli amerikan i qëndronte pranë familjes së Mandelës në këto momente kritike dhe se të gjitha lutjet ishin për të''. ''Mendimet dhe lutjet tona në këto momente janë për Mandelën dhe familjen e tij, të cilës populli amerikan i qëndron pranë në çdo moment'', deklaroi Obama, gjatë një konference për shtyp të përbashkët me kolegun e tij afrikanojugor, Jacob Zuma, në Pretoria. ''Ajo që ka ndodhur në Afrikën e Jugut vazhdon të ndriçojë si një far në të gjithë Botën'', theksoi kreu i Shtëpisë së Bardhë.

Policia afrikanojugore hodhi granata tymuese për shpërndarjen e protestuesve të cilët manifestojnë kundër presidentit amerikan, Barack Obama në Soweto, ku ai pritet të mbërrijë sot.

Forcat e policisë ndërhynë me anë të automjeteve të tyre për shpërndarjen e grupit prej rreth 200-300 personash të mbledhur përpara Universitetit të Johanesburgut. Ata iu drejtuan forcave të policisë me thirrje antiamerikane duke i quajtur ''policia e aparteidit''.

HermesNews - ©2013

Dërgo me email | Stampo artikullin