29/06/2013 06:43:41

Reçel me lëkura bostani

nga Brunhilda Çela

Sekretet e aromave të Brunhildës Gjëja e parë që ju duhet për këtë recetë është një shalqi lëkure trashë, këtë fat unë nuk e pata se i imi nuk ishte, prandaj u detyrova të mbaja dhe pak nga ajo pjesë rozë.

Mirë është të mos ketë asnjë pjesë rozë t'i hiqet komplet, por këtij timit po t'ia hiqja nuk i ngelej shumë trashësi, megjithatë nëse nuk e keni aq të trashe mos u mërzisni pasi gjatë zierjes nuk duket ndryshimi dhe del përsëri shumë i shijshëm.

Unë kisha lëkura të qvruara të pastruara rreth 2 kg. Unë i bëj me thikë me dhëmbëza se ashtu dalin më bukur, ju bëjini si të doni vetë. I futa në fillim rreth 2 orë në ujë gëlqereje duke përgatitur tretësirën 2 lugë gëlqereje për 3 l ujë.

Lëkurat duhet të notojnë në tretësirë. Gëlqeren mund ta përzieni dhe kulloni, merrni vetëm pjesën që del lart, por unë e bëj kështu pasi kam parë time vjehrrë që nuk e kullon dhe i bëhet shumë e mirë gjithashtu ime gjyshe e kullonte merrte vetëm ujin lart të pastër të gelqerës dhe aty fuste lëkurat.

Pasi kanë kaluar 2-3 orë në ujin e gëlqeres lëkurat i shpërlajmë mirë i ziejmë sa marrin dy-tre valë i shpërlajmë me ujë të ftohtë i ziejmë përsëri i shpërlajmë.

Pastaj përgatisim shërbetin 2 kg sheqer, 3 gota ujë dhe lëkurat i hedhim aty i ziejmë sa fillojnë të marrin një ngjyrë të lehtë. Kur shërbeti është gati kuptohet se bën një si fishkëllime. Në fund fare i hodha dhe lëngun e një limoni dhe ca gjethe barbarozë të freskët. Disa nuk i hedhin gjethe barbarozë e duan me aromën karakteristike të shalqinit (bostanit) ju bëjeni si doni. Disa i hedhin edhe pak vanilje për mua këtu vetëm barbaroza shkon ose asgjë fare.

HermesNews - ©2013

Dërgo me email | Stampo artikullin