27/06/2013 13:28:55

Dy shqiptarë në ekspozitën e artit “King, kali me sytë e diellit”

Ne ekspoziten artistike bashkëkohore “King, kali me sytë e diellit” do te marrin pjese edhe dy artista shqiptare

HermesNews- Nga data 2 deri më 10 korrik 2013 do të mbahet ekspozita artistike bashkëkohore “King, kali me sytë e diellit”. Në këtë ekspozitë marrin pjesë artistë nga vende të ndryshme të Italisë, të cilët kanë interpretuar historinë e kalit King me teknika dhe materiale të ndryshme, por punimet i përmbahen të gjitha përmasave 50x50.

Mes shumë piktorëve dhe artistave italian do të marrin pjesë edhe dy artista shqiptarë Alfred Mirashi Milot dhe Parlind Prelashi duke sjellë secili variante të ndryshme të historisë mallëngjyese të kalit King.

Historia e këtij kali ka prekur të gjithë artistët dhe jo vetëm. Eshtë historia e një kali që humb shikimin dhe ndjen dhimbje shumë të forta deri sa humb forcën për të reaguar. Ai adoptohet nga fëmijët me aftësi të kufizuara, të cilin e mbushin me dashuri dhe përkedhelje. Dalëngadalë King fillon ti rikthehet jetës, merr gjallëri, dhe mbi të gjitha fillon të shohë përmes syve të fëmijëve në një simbiozë perfekte, duke krijuar një besim të jashtëzakonshëm tek vogelushët.

Lind kështu ky projekt solidariteti ku cdo artisti i kërkohet të paraqesë një vepër arti në nder të kalit King. Secili ka përdorur teknika dhe materiale të ndryshme, ngjyra me vaj ose akrilik, duke kërkuar dhe matur brenda vetvetes emocionet dhe impulset që kthejnë një cast të vetëm në një vepër krijimtarie.

Pikërisht ky është edhe thelbi i vetë artit, përdorimi e gjuhëve të ndryshme artistike, fryt i ndjeshmërisë së artistit, përkthimi në figurë i të pamundurës, dëshira për tu ndarë nga realiteti përmes reflekseve të ngjyrave , elemente të cilët i japin jetë veprës artiktike si një sinfoni e larmishme.

Daniela Vathi

Dërgo me email | Stampo artikullin