25/06/2013 20:37:39

Zhdukja e bletëve të mjaltit

Së fundmi është vënë re një zhdukje masive e bletëve të mjaltit që shqetëson ambjentalistët dhe shkencëtarët

HermesNews - Së fundmi është vënë re një zhdukje masive e bletëve të mjaltit që shqetëson ambjentalistët dhe shkencëtarët. Sipas studimeve të deritanishme, fajtori kryesor për zhdukjen e kolonive të bletëve janë kompanitë kimike falë prodhimit të pesticideve.

Arsyet kryesore janë të shumta si për shembull përdorimi i pesticideve, thatësira, shkatërrimi i habitatit të tyre natyror, ngrohja globale dhe kështu me rradhë. Të gjithë këto faktore kanë lidhje mes tyre, por dimë gjithashtu që është njeriu fajtori kryesor falë përdorimit të lëndëve kimike, moskujdesi për ambientin dhe habitatin e tyre natyror.

Biologët kanë zbuluar mbi 150 lloje pesticidesh kimike brenda bletëve, të cilat kanë qenë vdekjeprurëse. Kompanitë kimike si Bayer, Syngenta, BASF, Dow, DuPont, Monsanto e të tjera kanë mbyllur sytë përpara këtij fenomeni, sikur të ishte një mister zhdukja e bletëve dhe ndërkohë nuk kanë ndërmarrë asnjë masë në formulimin e pesticideve. Shitja e helmeve është fitimprurese, pa marrë parasysh dëmin kolosal që i sjell ambjentit dhe natyrës.

Sikur të mos mjaftonte vetem kjo, habitati i bletëve shkatërrohet më tej nga viti në vit edhe nga aktiviteti agro- industrial që shkatërron pyje dhe lulishte duke u lënë vend monokulturave që abuzojnë në përdorimin e pesticideve që si rrjedhojë shkaktojne pasoja vdekjeprurëse për bletët.

Daniela Vathi

Dërgo me email | Stampo artikullin